বাজি আছিল যে পানীৰ লগত মিহলি নকৰাকৈ পাঁচ বটল মদ খাব পাৰিলে ১০ হাজাৰ টকা জিকিব। কৰ্ণাটকৰ এজন যুৱকে সেই প্ৰত্যাহ্বান গ্ৰহণ কৰিলে। ৫ বটল সুৰা পানী নোহোৱাকৈ সেৱন কৰি মৃত্যু ঘটে কাৰ্তিক (২১)ৰ।
অত্যধিক মদ খাই তেওঁ গুৰুতৰভাৱে অসুস্থ হৈ পৰে। চিকিৎসালয়ত ভৰ্তি কৰোৱা হৈছিল যদিও চিকিৎসাৰ সময়তে তেওঁৰ মৃত্যু হয়। সেই ঘটনাত কাৰ্তিকৰ ছয়জন বন্ধুৰ বিৰুদ্ধে নাংলি থানাত গোচৰ ৰুজু কৰা হৈছে। আৰক্ষীয়ে গ্ৰেপ্তাৰ কৰিছে দুজন অভিযুক্তক। বাকীসকলৰ সন্ধান অব্যাহত আছে।
জানিব পৰা মতে, কৰ্ণাটকৰ কোলাৰ জিলাৰ পূজাৰহল্লা গাঁৱৰ বাসিন্দা কাৰ্তিকে এবছৰ পূৰ্বে বিবাহপাশত আবদ্ধ হৈছিল। মাত্ৰ ৮ দিন আগতে তেওঁ পিতৃ হৈছিল। হঠাৎ দেওবাৰে নিশা কাৰ্তিকে বন্ধু ভেংকট ৰেড্ডী, সুব্ৰমণি আৰু আন তিনিজনক মদ্যপানৰ বাবে প্ৰত্যাহ্বান জনায়।
সেই প্ৰত্যাহ্বানৰ চৰ্ত আছিল কাৰ্তিকে পানীৰ লগত মিহলি নকৰাকৈ পাঁচ বটল মদ খাব লাগিব। বন্ধুসকলে দিয়া চৰ্তত তেওঁ মান্তি হ’ল। নিজৰ কথা ৰক্ষা কৰিবলৈ আৰু টকাৰ লোভত কাৰ্তিকে বন্ধুসকলৰ সন্মুখত পাঁচ বটল মদ খায়।
এক সূত্ৰৰ পৰা জানিব পৰা মতে, সুৰা সেৱন কৰি তেওঁ অসুস্থ হৈ পৰে। কাৰ্তিকৰ শাৰীৰিক অৱস্থাৰ অৱনতি ঘটাত তেওঁক কোলাৰ জিলাৰ মুলবাগালৰ এখন চিকিৎসালয়ত ভৰ্তি কৰোৱা হয়। চিকিৎসাৰ সময়ত তেওঁৰ মৃত্যু হয়।
কাৰ্তিকৰ মৃত্যুৰ পিছত ভেংকট ৰেড্ডী আৰু সুব্ৰমণি আৰু তেওঁৰ ছয়জন বন্ধুৰ বিৰুদ্ধে নাংলি থানাত গোচৰ ৰুজু হয়। ইতিমধ্যে আৰক্ষীয়ে গ্ৰেপ্তাৰ কৰিছে দুজন অভিযুক্তক। এই ঘটনাত কাৰ্তিকৰ পৰিয়ালটো বিধ্বস্ত হৈ পৰিছে।
চিকিৎসকৰ মতে, বিশেষকৈ পানী অবিহনে কম সময়ৰ ভিতৰতে বৃহৎ পৰিমাণৰ মদ খোৱা উচিত নহয়। শৰীৰৰ বাবে ই অতি ক্ষতিকাৰক। আনকি ইয়াৰ ফলত মৃত্যুও হ’ব পাৰে। পানী নোহোৱাকৈয়ে অত্যধিক মদ খোৱাৰ ফলতে কাৰ্তিকে মৃত্যুবৰণ কৰে।
