বিশ্বকাপ বিজয়ী টীম ইণ্ডিয়াৰ সদস্য ক্ৰিকেটাৰ ইউছুফ পাঠান এইবাৰ ৰাজনীতিৰ খেলপথাৰত। ইৰফান পাঠানৰ ককায়েকে নতুন ইনিংছ আৰম্ভ কৰিবলৈ ওলাইছে। ৪১ বছৰীয়া ইউছুফক লোকসভা নিৰ্বাচনত তৃণমূল কংগ্ৰেছৰ বহৰমপুৰৰ প্ৰাৰ্থী হিচাপে মনোনীত কৰা হৈছে। অৰ্থাৎ তেওঁ ৰাজ্যৰ কংগ্ৰেছ নেতা তথা লোকসভাৰ বিৰোধী দলপতি অধীৰ চৌধুৰীৰ বিৰুদ্ধে যুঁজ দিব।
দেওবাৰে তৃণমূল কংগ্ৰেছৰ লোকসভা নিৰ্বাচনৰ প্ৰাৰ্থীৰ তালিকা প্ৰকাশ পায়। তাত আটাইতকৈ ডাঙৰ চমক হৈছে ইউছুফ পাঠানৰ তৃণমূলত যোগদান। যদিও তেওঁৰ ৰাজনীতিৰ অভিজ্ঞতা নাই, তথাপিও পশ্চিমবংগৰ সৈতে তেওঁৰ সম্পৰ্ক আছে। তেওঁ দীৰ্ঘদিন ধৰি আই পি এলত কলকাতা নাইট ৰাইডাৰ্ছৰ হৈ খেলিছিল।
দেওবাৰে মুখ্যমন্ত্ৰী মমতা বেনাৰ্জী, মহুৱা মৈত্ৰ, ৰচনা বেনাৰ্জী, জুন মালিয়াৰস সৈতে তৃণমূলৰ মঞ্চত দেখা যায় পাঠানক। তেওঁ মুখ্যমন্ত্ৰী মমতা বেনাৰ্জীক তৃণমূলৰ প্ৰাৰ্থী হিচাপে মনোনীত কৰাৰ বাবে ধন্যবাদ জ্ঞাপন কৰে।
লগতে পঢ়কঃ বিজেপিৰ শেষ কথা? ‘বিজেপিক দুই তৃতীয়াংশ আসনত জিকালেই সংবিধানৰ পৰা আঁতৰিব ধৰ্মনিৰপেক্ষতা’
ইউছুফ পাঠানে কয়, “মই দিদিক প্ৰায় ১২ বছৰ ধৰি চিনি পাওঁ। অভিষেকৰ সৈতে মাত্ৰ এতিয়া কথা হৈছে। মোক তৃণমূলৰ প্ৰাৰ্থী কৰাৰ বাবে কৃতজ্ঞ।”
ইউছুফৰ জন্ম মোডীৰ চহৰত। বৰোদাৰ গুজৰাটী পৰিয়ালত জন্ম। সৰুৰে পৰা ক্ৰিকেট খেলি ভাল পাইছিল। বৰোদা বয়সভিত্তিক দলৰ নিয়মীয়া সদস্য আছিল। ২০০৭ চনত আন্তঃৰাষ্ট্ৰীয় ক্ৰিকেটত অভিষেক ঘটায়। দেওধৰ ট্ৰফীত এটা ভাল প্ৰদৰ্শনে নিৰ্বাচকসকলৰ দৃষ্টি আকৰ্ষণ কৰে।
২০০৭ চনত প্ৰথম টী-২০ বিশ্বকাপৰ বাবে দলত সুযোগ পাইছিল। ভাৰত-পাকিস্তানৰ ফাইনেল খেলখনত দেশৰ জাৰ্চিত অভিষেক ঘটে। ২০১২ চনলৈকে তেওঁ দেশৰ জাৰ্চি পিন্ধি টী-২০ ক্ৰিকেট খেলিছিল। ২০০৮ চনত এদিনীয়া ক্ৰিকেটত পদাৰ্পন কৰে। ২০১১ চনৰ বিশ্বকাপ বিজয়ী দলৰো সদস্য আছিল।
আই পি এলৰ প্ৰথমৰ পৰাই ৰাজস্থান ৰয়েলছৰ সদস্য আছিল। শ্বেন ৱাৰ্ণৰ দলটোৱেও আই পি এলত জয়লাভ কৰে। ইউছুফে ২০১১ চনৰ পৰা ২০১৭ চনলৈ একেৰাহে ছয় বছৰ কলকাতা নাইট ৰাইডাৰ্ছৰ হৈ খেলিছিল। অৱসৰৰ পিছত ইউছুফে নিয়মিতভাৱে লিজেণ্ডছ ক্ৰিকেট লীগত অংশগ্ৰহণ কৰিছে।
লগতে পঢ়কঃ সম্পত্তি বিক্ৰী কৰি হ’লেও ভৰিব লাগিব : নীৰৱ মোদীক ৮০ লাখ ডলাৰৰ জৰিমনা বিহিলে লণ্ডনৰ আদালতে
২২ গজত বিগ হিটাৰ হিচাপে পৰিচিত। আনায়াসে ছিক্সাৰ মাৰিব পাৰে। তেওঁৰ নিজৰ দিনটোত অকলেই মেচ জিকোৱাৰ ক্ষমতা থাকে। ৰাজনীতিৰ খেলপথাৰত এইবাৰ প্ৰত্যাহ্বানৰ সন্মুখীন হ’ব ইউছুফ। তেওঁৰ বিৰুদ্ধে খেলিব অভিজ্ঞ ৰাজনীতিবিদ অধীৰ চৌধুৰী। প্ৰশ্ন হৈছে, ৰাজনীতিৰ মঞ্চতো ইউছুফে ছিক্সাৰ মাৰিবলৈ সক্ষম হ’বনে?
