India Week at Humburg in Germany অসমৰ পৰা গৈ জাৰ্মানীত প্ৰতিষ্ঠা লাভ কৰা ড৹ খাফিলুজ্জামান আহমেদৰ জামানছ ইষ্ট ইণ্ডিয়া ট্ৰেভেল ওডিচিৰ উদ্যোগত জাৰ্মানীৰ হামবাৰ্গ মহানগৰীত অনুষ্ঠিত হৈছে ভাৰত সপ্তাহ নামৰ এক বিশেষ অনুষ্ঠানৰ ৷
৮ নবেম্বৰৰ পৰা ১৫ নবেম্বৰলৈকে জাৰ্মানীৰ পৰ্যটকক ভাৰতৰ উত্তৰ পূৰ্বাঞ্চলৰ প্ৰতি অধিক আকৰ্ষিত কৰাৰ বাবে আয়োজিত হোৱা এই অনুষ্ঠান উদ্বোধন কৰে হামবাৰ্গত থকা ভাৰতীয় কনচুল জেনেৰেল জন এইচ ৰ’ল্ডগোলে।
সপ্তাহজোৰা এই অনুষ্ঠানত অসমৰ হৈ শ্ৰীমন্ত ভূঞা আৰু আবিদুৰ ৰহমান, মিজোৰামৰ আৰু নাগালেণ্ডৰ হৈ জন লালনোটলোংগাই আৰু চিৰঞ্জীৱ দত্তই ত্ৰিপুৰাক প্ৰতিনিধিত্ব কৰি সচিত্ৰ উপস্থাপনেৰে ৰাজ্যৰ কলা সংস্কৃতিক জাৰ্মানীৰ পৰ্যটকৰ আগত দাঙি ধৰে ৷
জাৰ্মানীৰ এই ভাৰত সপ্তাহত আলোচনা আৰু সচিত্ৰ উপস্থাপনৰ উপৰিও উত্তৰ পূৰ্বাঞ্চলৰ বিশেষকৈ অসম, মিজোৰাম আৰু মেঘালয়ৰ হস্ত তাঁত বস্ত্ৰৰো আকৰ্ষণীয় প্ৰদৰ্শনী অনুষ্ঠিত হয় ৷
অসমৰ এৰি আৰু মুগা কাপোৰৰ বাবে চিলঙৰ ডেনিয়েল চিয়েম আৰু গুৱাহাটীৰ ৱোৱনে সকলোকে আকৰ্ষণ কৰে ৷ নেষ্ট নামৰ সংগঠনৰ অৰ্পিত আগ্ৰৱালাই এৰি পলু আৰু লেটাৰে এক অকৰ্ষণীয় অনুষ্ঠান উপস্থাপন কৰে ৷
অনুষ্ঠানত অসমৰ চাহ আৰু গল্ফ পৰ্যটনৰ ওপৰতো আলোচনা কৰা হয় ৷ অসমৰ বোকাখাতৰ পৰা যোৱা বিশিষ্ট টুৰিষ্ট গাইড আবিদুৰ ৰহমানে অসমৰ বন্যপ্ৰাণী আৰু চৰাইৰ ওপৰত দিয়া উপস্থাপন আৰু পৰ্যটনৰ ব্যৱস্থাৱলীৰ বিৱৰণে সকলোকে আকৰ্ষণ কৰে ৷
সপ্তাহ জোৰা এই অনুষ্ঠানত অসমৰ জাতীয় সংগীতৰ লগতে গীত মাতো পৰিবেশন কৰা হয় ৷
