ৰাছিয়াৰ ৰাষ্ট্ৰপতি ভ্লাদিমিৰ পুটিনে আকস্মিকভাৱে ৩০ ঘণ্টীয়া যুদ্ধবিৰতি ঘোষণা কৰাৰ পিছতো তাৰ সন্মান কৰা নাই। যুদ্ধবিৰতিৰ সময়ছোৱাত ইউক্ৰেইনত ‘আক্ৰমণাত্মক অভিযান’ চলি আছে, আকাশত ৰাছিয়াৰ ড্ৰ’ন উৰি থকা দেখা গৈছে, আৰু গোলাবৰ্ষণ চলি আছে। এই সকলোবোৰ অভিযোগ উত্থাপন কৰিছে ইউক্ৰেইনৰ ৰাষ্ট্ৰপতি ভল’ডিমাইৰ জেলেনস্কিয়ে।
শনিবাৰে মস্কোত ৰাছিয়াৰ সশস্ত্ৰ বাহিনীৰ মুখ্য কৰ্মচাৰী ভেলেৰী গেৰাচিমোভৰ সৈতে সাক্ষাৎ কৰে পুটিনে। সেই সময়ত টেলিভিছনত দিয়া ভাষণত পুটিনে ৩০ ঘণ্টীয়া যুদ্ধবিৰতি ঘোষণা কৰিছিল। প্ৰধানকৈ খ্ৰীষ্টানধৰ্মাৱলম্বীসকলৰ উৎসৱ ইষ্টাৰ ছানডে উপলক্ষে এই যুদ্ধবিৰতি ঘোষণা কৰা হৈছিল।
পুটিনৰ ঘোষণা অনুসৰি ৰাছিয়াই শনিবাৰে স্থানীয় সময় অনুসৰি সন্ধিয়া ৬ বজাৰ পৰা দেওবাৰে মাজনিশালৈকে যুদ্ধবিৰতিৰ অধীনত ইউক্ৰেইনত আক্ৰমণ বন্ধ ৰাখিব। অৱশ্যে এই সময়ত পুটিনে ইউক্ৰেইনৰ পৰা সম্ভাৱ্য আক্ৰমণ প্ৰতিহত কৰিবলৈ নিজৰ বাহিনীক সম্পূৰ্ণ সাজু হ’বলৈও নিৰ্দেশ দিছিল।
পুটিনে কয় যে মানৱীয় কাৰণত মই এই সময়ত কোনো ধৰণৰ সামৰিক আক্ৰমণ নকৰিবলৈ নিৰ্দেশ দিছো।
পুটিনৰ বক্তব্যৰ পিছত জেলেনস্কিয়ে ছ’চিয়েল মিডিয়া এক্সত পোষ্ট কৰে।তাত তেওঁ লিখিছে, “এয়া পুটিনে মানুহৰ জীৱনৰ সৈতে খেলা কৰাৰ আন এক প্ৰচেষ্টা… আমাৰ আকাশত শ্বাহেদ ড্ৰ’নৰ উপস্থিতিয়ে ইষ্টাৰ ছানডে আৰু মানুহৰ জীৱনৰ প্ৰতি পুটিনৰ প্ৰকৃত মনোভাৱ দাঙি ধৰিছে।”
পিছত জেলেনস্কিয়ে আন এটা এক্স পোষ্টত লিখিছে যে যদিহে এতিয়া ৰাছিয়াই হঠাতে সম্পূৰ্ণ আৰু নিঃচৰ্ত মৌনতাৰ অৱস্থানলৈ আগবাঢ়ি যাবলৈ সাজু হয় তেন্তে তেওঁৰ দেশখনে যুদ্ধবিৰতি মানি চলিব। জেলেনস্কিয়ে “যুদ্ধবিৰতি” বৃদ্ধি কৰাৰ পৰামৰ্শও আগবঢ়ায়।
জেলেনস্কিয়ে লগতে অভিযোগ কৰে যে পুটিনে আক্ৰমণৰ ৩০ ঘণ্টীয়া বিৰতি ঘোষণা কৰাৰ পিছতো ৰাছিয়াৰ কুৰ্স্ক অঞ্চল আৰু বেলগ’ৰডত যুদ্ধ অব্যাহত আছে। আনকি ইউক্ৰেইনৰ বিভিন্ন ঠাইত এতিয়াও ৰাছিয়াৰ ড্ৰ’ন উৰি আছে। অৱশ্যে কিছু অঞ্চলত যুদ্ধ বন্ধ হৈ পৰিছে।
২০২২ চনৰ ফেব্ৰুৱাৰী মাহত ৰাছিয়া আৰু ইউক্ৰেইনৰ মাজত সৰ্বাত্মক যুদ্ধ আৰম্ভ হয়। তাৰ পিছৰে পৰা তিনি বছৰতকৈও অধিক সময় এই যুদ্ধ চলি আছে। ইউক্ৰেইনৰ যুদ্ধৰ অন্ত পেলাবলৈ কিয়েভ আৰু মস্কোৰ মাজত শান্তি চুক্তিৰ মধ্যস্থতা কৰিবলৈ চেষ্টা কৰিছে আমেৰিকাৰ ৰাষ্ট্ৰপতি ড’নাল্ড ট্ৰাম্পে। অৱশ্যে এই ক্ষেত্ৰত এতিয়াও কোনো আশাৰ পোহৰ দেখা যোৱা নাই।
