জনপ্রিয় কন্ঠশিল্পী তথা নৱ প্রজন্মৰ হিয়াৰ আমঠু জুবিন গাৰ্গৰ মৃত্যুত শোক প্রকাশ কৰিছে ভূমি অধিকাৰ যৌথ সংগ্রাম সমিতিয়ে।
এই বিজ্ঞপ্তিযোগে যৌথ সংগ্রাম সমিতিৰ অন্যতম আহ্বায়ক কৃষ্ণ গগৈ, প্রণৱ দলে আৰু সুব্রত তালুকদাৰে কয় যে, জুবিন গাৰ্গৰ মৃত্যু অসমৰ জাতীয় জীৱনৰ বাবে ডাঙৰ ক্ষতি। অসমীয়া আধুনিক গানক জনপ্রিয় কৰাত সমসাময়িক সকলোতকৈ জুবিন গাৰ্গৰ ভূমিকাই সৰ্বাধিক আছিল। গণশিল্পী ভূপেন হাজৰিকাৰ পিছৰ প্রজন্ম জুবিন গাৰ্গে অকৃত্ৰিমভাবে অসমীয়া গানক আগুৱাই নিয়াত কোনো ক্ৰটি ৰাখিব বিচৰা নাছিল।
স্বভাবসূলভ ধৰ্মনিৰপেক্ষ গায়ক তথা কন্ঠশিল্পীগৰাকীয়ে চৰকাৰৰ বিভিন্ন ভুল ত্রুটিক লৈও আঙুলিয়াই দিছিল। অসমৰ জাতীয় জীৱনৰ ডাঙৰ শত্রু কা’ বাতিল কৰাৰ কাৰণে তেওঁ দাবী জনাইছিল। সামন্তবাদী ব্যবস্থাক তেওঁৰ বিশেষ আদৱ – কায়দা আৰু কথা – বতৰাৰ ভংগীৰে থকা – সৰকা কৰি দিছিল। কালি ছিংগাপুৰত তেওঁৰ অকাল মৃত্যুৱে কাৰ্যত: ৰাজ্যখনত এক শূন্যতাৰ সৃষ্টি কৰিছে।
এই জটিল মূহুর্তত ভূমি অধিকাৰ যৌথ সংগ্রাম সমিতিয়ে জুবিন গাৰ্গলৈ শ্রদ্ধাঞ্জলি জনোৱাৰ লগতে তেওঁৰ অসংখ্য গুণমুগ্ধ আৰু পৰিয়াললৈ সমবেদনা জনাইছে। লগতে কি পৰিস্থিতিত জুবিন গাৰ্গৰ দৰে এক ব্যক্তিত্বই ছিংগাপুৰত অকাল মৃত্যুক সাৱটি লব লগা হ’ল, তাৰ এক উচ্চ পৰ্যায়ৰ তদন্তৰ দাবী কৰিছে যৌথ সংগ্রাম সমিতিয়ে।
