ৰাজ্যত বন্যপ্ৰাণী-মানুহৰ মাজত বৰ্ধিত সংঘাত ৰোধৰ বাবে বিশেষ ব্যৱস্থা গ্ৰহণ কৰিবলৈ তৎপৰ হৈছে বন বিভাগ।
সেই অনুসৰি অসমৰ বন বিভাগে আধুনিক প্ৰযুক্তিৰ ব্যৱহাৰ কৰি বিভিন্ন বনাঞ্চলৰ হাতী অহা-যোৱা কৰা বাটত ছেন্সৰযুক্ত প্ৰতিবন্ধক স্থাপনৰ উদ্যোগ গ্ৰহণ কৰিছে।লগতে হাতী অহাৰ তথ্য বন বিভাগে স্থানীয় ৰাইজৰ লগত আদান-প্ৰদান কৰি সংঘাত পৰিহাৰ কৰিবলৈ চেষ্টা কৰিব।
উল্লেখযোগ্য যে অসম বিধানসভাত যোৱা বৃহস্পতিবাৰে বনমন্ত্ৰী প্ৰমীলাৰাণী ব্ৰক্ষ্মই এই বিষয়ে সদৰী কৰি লগতে কয় যে ভৱিষ্যতে যাতে বন্যপ্ৰাণী-মানুহৰ সংঘাতৰ পৰা হোৱা ক্ষতি ৰোধ কৰিব পৰা যায় তাৰ বাবে সৌৰ শক্তিচালিত বৈদ্যুতিক বেৰৰ ব্যৱস্থা কৰা হৈছে।
বনমন্ত্ৰী প্ৰমীলাৰাণী ব্ৰক্ষ্মই লগতে সদনত উল্লেখ কৰে যে বন্যপ্ৰাণী-মানুহৰ সংঘাতৰ বাবে ২০১৬-১৭ বৰ্ষত প্ৰায় ১,৭৫২টা গৃহৰ ক্ষতি হোৱাৰ উপৰি ১,২০৮টা পৰিয়ালৰ ৬৩৪,৬০ হেক্টৰ বিঘা কৃষিভূমি বিনষ্ট হৈছে।
ইয়াৰ বিপৰীতে ২০১৭-১৮ বৰ্ষত ১,৭৯৪টা গৃহ বিধ্বস্ত হোৱাৰ উপৰি ২,১৯৪টা পৰিয়ালৰ প্ৰায় ১২৪৬,১০ হেক্টৰ কৃষিভূমি বিনষ্ট হৈছে।
আনহাতে বন্যপ্ৰাণী-মানুহৰ সংঘাত ৰোধৰ বাবে ৰাজ্যৰ প্ৰতিটো এলিফেণ্ট কৰিড’ৰত আৰক্ষী, ৰাজহ গাঁৱৰ প্ৰতিনিধি, বন বিভাগ, গড়কাপ্টানী বিভাগ, এপিডিচিএল, ৰেলৱে, অঞ্চল বিশেষৰ উপায়ুক্ত আৰু স্বেচ্ছাসেৱী সংগঠনৰ প্ৰতিনিধিক লৈ একোখনকৈ সমিতি গঠন কৰা হ’ব বুলিও সদনক অৱগত কৰে বনমন্ত্ৰী গৰাকীয়ে।
