অহা ২২ জুলাইত ত্ৰিপুৰাৰ ৰাজধানী আগৰতলাৰ ছালবাগানস্থিত ফ্ৰণ্টিয়াৰ বিএছএফৰ মুখ্য কাৰ্যালয়ত ভাৰত আৰু বাংলাদেশৰ সীমান্ত সুৰক্ষা বাহিনীৰ এখন চাৰিদিনীয়া বৈঠক অনুষ্ঠিত হ’ব। বিএছএফৰ এগৰাকী উচ্চ পদস্থ বিষয়াই এই কথা জানিবলৈ দিয়ে।
ইন্সপেক্টৰ জেনেৰেল পৰ্যায়ৰ উক্ত বৈঠকত বাংলাদেশ সীমান্ত সুৰক্ষা বাহিনীৰ চৰাইল আৰু চট্টগ্ৰামৰ ৰিজ’নেল কমাণ্ডাৰ আৰু বিএছএফৰ ত্ৰিপুৰা, মেঘালয় আৰু কাছাৰ ফ্ৰণ্টিয়াৰ বিষয়াৰ উপস্থিতিত সীমান্ত সুৰক্ষা, ভাৰত-বাংলাদেশ সীমান্তত সংঘটিত বিভিন্ন অপৰাধ তথা অনৈতিক কাৰ্যকলাপ আদি কেনেদৰে ৰোধ কৰিব পৰা যাব সেই বিষয়ে বিস্তৃত ৰূপত আলোচনা কৰা হ’ব বুলি ত্ৰিপুৰা ফ্ৰণ্টিয়াৰৰ বিএছএফ আইজি এল লোহিয়াই জনায়।
তেওঁ লগতে কয় যে ত্ৰিপুৰা-বাংলাদেশ সীমান্তৰ সুৰক্ষা বাহিনীৰ সম্পূৰ্ণ সহযোগিতাত অবৈধ কাৰ্যকলাপৰ লগতে অপৰাধজনিত সমস্যা এই অঞ্চলটোত বহু পৰিমাণে হ্ৰাস পাইছে।
বাংলাদেশ সীমান্ত সুৰক্ষা বাহিনীয়ে সীমান্তৰ নিৰাপত্তা অধিক সু নিশ্চিত কৰাৰ উদ্দেশ্যে অলপতে চট্টগ্ৰাম হিল ট্ৰেক্টত পাঁচটা সুৰক্ষা চকী স্থাপন কৰিছে বুলিও আইজি এল লোহিয়াই উল্লেখ কৰে।
ইয়াৰ উপৰি সীমান্তত ফেন্সিঙৰ ব্যৱস্থা প্ৰৱৰ্তন হোৱাৰে পৰা উগ্ৰপন্থীৰ গতিবিধিৰ লগতে বিভিন্ন অপৰাধ কাৰ্যকলাপ লোপ পাইছে।
উল্লেখ্য যে ৮৫৬ কিলোমিটাৰ সংলগ্ন ভাৰত-বাংলা সীমান্তত ইতিমধ্যে এই পৰ্যন্ত প্ৰায় ৯০ শতাংশ ফেন্সিঙৰ কাম সম্পন্ন হৈছে।
