অৰুণাচল প্ৰদেশৰ ৩২ সংখ্যক ৰাজ্যিক দিৱসৰ অনুষ্ঠানত ৰাজ্যবাসীক শুভেচ্ছা প্ৰদান কৰে মুখ্য মন্ত্ৰী পেমা খাণ্ডুৱে। ভাষণ প্ৰসংগত তেওঁ কয় যে প্ৰগতিৰ ক্ষেত্রত ৰাজ্যখনে আৰু এখোজ আগুৱাবলৈ সক্ষম হ’ব।
ৰাজ্যখনত এখন সুস্থিৰ সবল চৰকাৰ পৰিচালিত কৰিবলৈ সকলো ৰাইজে দুৰ্নীতিৰ বিৰুদ্ধে একগোট হৈ থিয় দিব লাগিব। ইয়াৰ উপৰি অনাগত দিনত ৰাজ্যখনৰ সকলো সম্ভৱণাপূৰ্ণ খণ্ডতে নিযোগ সৃষ্টি কৰি ৰাজ্যৰ নিৱনুৱাসকলক সুবিধা প্ৰদান কৰিব বুলিও মুখ্য মন্ত্ৰী খাণ্ডুৱে ৰাজ্যবাসীক ৰাজ্যিক দিৱসৰ দিনা আশ্বাস প্ৰদান কৰে।
‘বৰ্তমান সকলো অৰুণাচলবাসীয়ে প্ৰগতি, উন্নয়ন আৰু এখন সমৃদ্ধিশালী ৰাজ্যৰ দিশে আগবঢ়াটো বিচাৰে। এনে ধৰণৰ পৰিৱৰ্তনৰ বাবে এটা সুন্দৰ পৰিৱেশ গঢ়ি তোলাটো আমাৰ দায়িত্ব’, অনুষ্ঠানৰ জৰিয়তে এনেদৰে মন্তব্য কৰে খাণ্ডুৱে।
আনহাতে এই অনুষ্ঠানতে মুখ্য মন্ত্ৰী খাণ্ডুৱে তেওঁলোকৰ চৰকাৰে ৰাজ্যখনৰ উন্নয়নৰ বাবে কৰা বিভিন্ন কাম-কাজৰ খতিয়ানো দাঙি ধৰে। আমাৰ শাসনকালত তথ্য-প্ৰযুক্তিবিদ্যাৰ ক্ষেত্ৰত উদ্যোগ গ্ৰহণ, পূব আৰু পশ্চিম অৰুণাচলত দুটাকৈ মণ্ডল আয়ুক্ত স্থাপন, নতুন কমলে জিলা গঠন, বুনিয়াদী সা-সুবিধাৰ উন্নয়ন, যোগাযোগ ব্যৱস্থা আদি দিশত যথেষ্ট উন্নয়ন সাধন হৈছে। ইয়াৰ উপৰি ৰাজ্যখনৰ উন্নয়নৰ বাবে আৰু অধিক কৰিবলগীয়া আছে বুলিও কয় খাণ্ডুৱে।
‘আমাৰ চৰকাৰে ‘ড্ৰীম চেঞ্জ অৰুণাচল ২০২৭’ শীৰ্ষক এক অংশগ্ৰহণমূলক নীতিনিৰ্ধাৰক সন্মীলনৰ আয়োজন কৰিছিল য’ত এক হাজাৰৰো অধিক প্ৰতিনিধিয়ে অংশগ্ৰহণ কৰিছিল। অৰুণাচল প্ৰদেশৰ উন্নয়নৰ বাবে শিক্ষাবিদ, প্ৰগতিশীল কৃষক আদিয়ে সন্মীলনত অংশগ্ৰহণ কৰি বিভিন্ন পৰিকল্পনাৰ বিষয়ে আলোচনা কৰে। একেদৰে ২০১৮-১৯ বিত্তীয় বৰ্ষৰ বাজেট দাখিলৰ পূৰ্বে সৰ্বসাধাৰণৰ পৰা পৰামৰ্শ লোৱাৰো ব্যৱস্থা গ্ৰহণ কৰিছো’, খাণ্ডুৱে মন্তব্য কৰে।
উন্নয়নত যাতে কোনো ধৰণৰ বাধাৰ সন্মুখীন নহয় তাৰ বাবে ৰাজ্যত শান্তি-শৃংখলা অটুট থকাতো অতিশয় প্ৰয়োজনীয়।
খাণ্ডুৱে ৩২ সংখ্যক ৰাজ্যিক দিৱসৰ অনুষ্ঠানৰ শেষত কয়, ‘এই ঐতিহাসিক ক্ষণত ৰাজ্যখনৰ অভূতপূৰ্ব উন্নয়নৰ গতি ৰুদ্ধ নহ’বলৈ মই সকলোকে সুখ-শান্তি বৰ্তাই ৰাখিবলৈ আহ্বান জনাইছো’।
