অহা ৩১ ডিচেম্বৰত প্ৰকাশ পাবলগীয়া ৰাষ্ট্ৰীয় নাগৰিক পঞ্জীৰ খচৰাৰ প্ৰস্তুতি বৰ্তমান সময়ত প্ৰায় তুংগত উঠাটো পৰিলক্ষিত হৈছে। এনে সময়তে কেন্দ্ৰীয় গৃহ মন্ত্ৰণালয়ৰ এটা দল এন আৰ চি খচৰাৰ অগ্ৰগতি সম্পৰ্কে বুজ লোৱাৰ উদ্দ্যেশ্যে আজি গুৱাহাটীত উপস্থিত হ’ব। জানিব পৰা মতে আজি সন্ধিয়া গুৱাহাটীত উপস্থিত হৈ কাইলৈ পুৱা প্ৰথমে ব্ৰহ্মপুত্ৰ অতিথি শালাত মুখ্যমন্ত্ৰী সৰ্বানন্দ সোণোৱালৰ সৈতে এখন বৈঠকত মিলিত হোৱাৰ লগতে পৰবৰ্তী পৰ্য্যায়ত ৰাষ্ট্ৰীয় নাগৰিকপঞ্জী উন্নীতকৰণৰ বিষয়াৰ সৈতেও এক বৈঠকত মিলিত হ’ব। এন আৰ চি বিষয়াৰ সৈতে হ’বলগীয়া বৈঠকখন প্ৰশাসনিক পদাধিকাৰ মহাবিদ্যালয়ত অনুষ্ঠিত হ’ব বুলি জানিব পৰা গৈছে।
বৰ্তমানৰ কেন্দ্ৰীয় গৃহ সচিব ৰাজীৱ গৌবাৰ নেতৃত্বত অসমলৈ আহিবলগীয়া গৃহ মন্ত্ৰণালয়ৰ দলটোৱে ৰাজ্যৰ আইন-শৃংখলা পৰিস্থিতি বুজ লোৱাৰ লগতে আইন-শৃংখলা পৰিস্থিতিৰ অধিক কটকটীয়া কৰাৰ ক্ষেত্ৰত এক আলোচনাত মিলিত হ’ব। আনহাতে এন আৰ চি ৰ প্ৰথমখন খচৰা প্ৰকাশ কৰাৰ পিছত যাতে কোনো ধৰণৰ অপ্ৰীতিকৰ পৰিস্থিতিৰ সৃষ্টি নহয় তাৰ প্ৰতি অসম আৰক্ষীয়ে তীক্ষ্ন দৃষ্টি ৰাখিছে বুলি অতিৰিক্ত আৰক্ষী সঞ্চালক প্ৰধান পল্লব ভট্টাচাৰ্য্যই জানিবলৈ দিয়ে। ইয়াৰ উপৰি অসম আৰক্ষীৰ বিশেষ শাখাৰ এ ডি জি পি গৰাকীয়ে প্রকাশ কৰে যে প্ৰতিখন জিলাৰ এন আৰ চি সেৱা কেন্দ্ৰ, ৰাজহ চক্র বিষয়াৰ কার্যালয়, জিলাৰ উপায়ুক্তৰ কাৰ্যালয়ত পর্যাপ্ত নিৰাপত্তা গঢ়ি তোলা হৈছে।
ইতিমধ্যে প্ৰথমখন খচৰা ২.৩৮ কোটি লোকক লৈ অহা ৩১ ডিচেম্বৰৰ ভিতৰত প্রকাশ কৰিবলৈ উচ্চতম ন্যায়ালয়ে কঠোৰ নির্দেশনা জাৰি কৰিছে। এই ক্ষেত্ৰত ৩৮ লাখ লোকৰ নথি-পত্ৰৰ পুনৰীক্ষণ প্রক্রিয়াৰ অধীনত ৰাজ্যজুৰি বর্তমানলৈকে প্রায় ৭৫ শতাংশ নিৰীক্ষণ সম্পূৰ্ণ হৈছে। ২৫ ডিচেম্বৰৰ ভিতৰত ৩৮ লাখ লোকৰ নথি-পত্ৰৰ পুনৰীক্ষণ প্রক্রিয়া সম্পূর্ণ কৰাৰ লক্ষ্য বান্ধি লৈছে এন আৰ চি কর্তৃপক্ষই। এই বিষয়েও আজি গুৱাহাটীলৈ আহিবলগীয়া গৃহ মন্ত্ৰমালয়ৰ দলটোৱে এন আৰ চি বিষয়া সকলৰ সৈতে শুক্ৰবাৰে এক আলোচনাত মিলিত হ’ব।
