আজিৰে পৰা মৰিগাওঁ জিলাৰ জাগীৰোডৰ ঐতিহ্যমণ্ডিত জোনবিলৰ পাৰত আৰম্ভ হ’ব ঐতিহাসিক জোনবিল মেলা। আধুনিকতাৰ ধামখুমীয়াত হেৰাই যাবলৈ ধৰা তাহানিৰ বিনিময় প্ৰথাক ধৰি ৰখা পাহাৰ-ভৈয়ামৰ সমন্বয়ৰ প্ৰতীক স্বৰূপ এই মেলাখন পৰম্পৰাগতভাৱে চলি অহাৰ দৰে এইবাৰো তিনিদিনীয়া কাৰ্য্যসূচীৰে অনুষ্ঠিত কৰা হ’ব।
গোভা দেওৰজা চাৰিভাই দেওশাল শিবমন্দিৰত মাংগলিক পৰ্বৰে এই জোনবিল মেলাখনৰ প্ৰথম দিনৰ কাৰ্য্যসূচীৰ শুভাৰম্ভণি হ’ব। পতাকা উত্তোলনকে ধৰি অন্যান্য বহুতো কাৰ্য্যসূচী অনুষ্ঠিত হ’ব লগীয়া মেলাখনৰ প্ৰথম দিনাই পাহাৰৰ জনগোষ্ঠীয় লোকসকলৰ আগমন ঘটিব।
দিনৰ ১:৩০ বজাত গোভাৰজাৰ সৈতে সকলোৰে এক প্ৰীতিভোজ আয়োজন কৰা হৈছে য’ত বৰ্তমানৰ গোভা ৰজা দীপসিং দেওৰজা আৰু পাটনিয়া ৰজা ভদ্ৰসিং দেওৰজা উপস্থিত থাকিব।
আনহাতে ১৯ জানুৱাৰি, অৰ্থাৎ দ্বিতীয় দিনাৰ পুৱাই পাহাৰৰ পৰা অহা তিৱা, কাৰ্বি, জয়ন্তীয়া, খাচি, গাৰো জনগোষ্ঠীৰ লোকসলে ভৈয়ামৰ তিৱাসকলৰ সৈতে পৰম্পৰাগত বিনিময় প্ৰথাৰ আৰম্ভণি কৰিব।
এই কাৰ্য্যসূচীৰ উদ্বোধন কৰিব মৰিগাওঁ সমষ্টিৰ বিধায়ক ৰমাকান্ত দেউৰীয়ে। পৰম্পৰা অনুসৰি পাহাৰীয়া লোকসকলে পাহাৰত উৎপাদিত আলু, কচু, হালধি, বাঁহগাজ, জলকীয়া, ঠেকেৰা ইত্যাদি সামগ্ৰীৰ সৈতে ভৈয়ামত উৎপাদিত সান্দহ, পিঠা, মাছ, শুকান মাছ আদিৰ সাল-সলনি কৰে।
বিনিময় প্ৰথাৰ কাৰ্য্যসূচীৰ পিছতে পুৱা ৯:০০ বজাৰ পৰা সমূহীয়াভাবে জোনবিলত মাছ মৰা কাৰ্য্যসূচীৰ আৰম্ভ হ’ব।
ইয়াৰ পিছতে সেই মাছেৰে ৰজাৰ সৈতে সকলোৱে মিলি বিলৰ পাৰতে ভোজভাত খাব। সূত্ৰটোৱে কোৱা মতে ইয়াৰ পিছদিনা সকলো ৰাইজৰ বাবে এই বিলখন মাছ মৰাৰ বাবে মুকলি কৰি দিয়া হ’ব, যিটো এটা পৰম্পৰা।
সেইদিনাই দিনৰ ১১:০০ বজাৰ পৰা গোভা ৰজাৰ সাংস্কৃতিক অনুষ্ঠানৰ আৰম্ভণি হ’ব। এই কাৰ্য্যসূচীৰ শুভাৰম্ভ কৰিব জাগীৰোড সমষ্টিৰ বিধায়ক পীয়ূষ হাজৰিকাই।
২০ জানুৱাৰি অৰ্থাৎ জোনবিল মেলাৰ শেষৰ দিনা তিৱা ৰজাসকলক ৰাজভাত্তা প্ৰদান অনুষ্ঠানত মুখ্য মন্ত্ৰী সৰ্বানন্দ সোণোৱাল, স্বাস্থ্য তথা শিক্ষা মন্ত্ৰী ড০ হিমন্ত বিশ্ব শৰ্মা, জাগীৰোডৰ বিধায়ক পীয়ূষ হাজৰিকা, মৰিগাওঁ জিলাৰ উপায়ুক্ত হেমেন দাস, তিৱা স্বায়ত্তশাসিত পৰিষদৰ মুখ্য কাৰ্য্যবাহী সদস্য পৱন মান্তা আৰু মৰিগাওঁ জিলাৰ আৰক্ষী অধীক্ষক স্বপ্ননীল কাকতী উপস্থিত থাকিব।
আনহাতে মেলাখনৰ আন্তঃগাঁথনি উন্নয়নৰ বাবে মুখ্য মন্ত্ৰী সৰ্বানন্দ সোণোৱালে ঘোষণা কৰা ১ কোটি টকা ৰাজ্য চৰকাৰৰ ফালৰ পৰা মুকলি কৰি দিয়াৰ কাৰণে মুখ্য মন্ত্ৰী তথা ৰাজ্য চৰকাৰলৈ তিৱা ৰাজদৰবাৰে ধন্যবাদ জ্ঞাপন কৰিছে
