অসমীয়া চলচ্চিত্ৰলৈ আৰু এটা সুখৱৰ কঢ়িয়াই আনিছে আন এখন শিশু ছবিয়ে। আমেৰিকা যুক্তৰাষ্ট্ৰত অনুষ্ঠিত এখন চলচ্চিত্ৰ মহোৎসৱত অসমৰ সন্ত্ৰাস জৰ্জৰ সময়ৰ ছবি দাঙি ধৰা এখন শিশু ছবিয়ে আঠটাকৈ মনোনয়ন লাভ কৰিবলৈ সক্ষম হৈছে।
বিদ্যুৎ কটকী পৰিচালিত ‘শৈশৱতে ধেমালিতে’ শিশু ছবিখনে লছ এঞ্জেলছৰ লাভ ইন্টাৰনেশ্যনেল ফিল্ম ফেষ্টিভেলত (এলআইএফএফ) শ্ৰেষ্ঠ কাহিনী ছবি, পৰিচালক, চিত্ৰনাট্য, অভিনেতা (নকুল বৈদ্য), অভিনেত্ৰী (দিপান্বিতা শৰ্মা), সহযোগী অভিনেতা (ভিক্টৰ বেনাৰ্জী), চিনামাটোগ্ৰাফী (সত্য প্ৰকাশ ৰথ) আৰু সংগীত (অনুৰাগ শইকীয়া)কে ধৰি মুঠ আঠটা শাখাত মনোনয়ন লাভ কৰিছে।
সংবাদ প্ৰতিষ্ঠানৰ বাতৰি অনুসৰি বঁটা সমূহ বেভাৰলী হিলছত অহা ৭ জুলাইত ঘোষণা কৰা হ’ব। মুম্বাইস্থিত পৰিচালক কটকীয়ে সংবাদ প্ৰতিষ্ঠানক আগত প্ৰকাশ কৰিছে, ‘’ এয়া অৱশ্যেই এক সন্মান। এই স্বীকৃতিয়ে বিশেষভাৱে সুখী কৰিছে কিয়নো এই মহোৎসৱৰ লক্ষ্যই হৈছে বিশ্বক একেবাৰে ওচৰ চপাই অনা আৰু চলচ্চিত্ৰৰ জৰিয়তে প্ৰেম তথা একতাক তুলি ধৰা।‘’
আশীৰ দশকৰ অসম আন্দোলনৰ সময়ত সৃষ্টি হোৱা শিশুৰ মানসিক দ্বন্দ্বৰ সঁচা কাহিনীৰ ওপৰত চলচ্চিত্ৰখন নিৰ্মাণ কৰা হৈছে। চলচ্চিত্ৰখনত নিপন গোস্বামী, নাভেদ আচলাম আৰু নিকুমনি বৰুৱাৰ দৰে প্ৰতিষ্ঠিত শিল্পীয়ে অভিনয় কৰিছে।
২০১৭ চনত চলচ্চিত্ৰখনে হলিউদ ইন্টাৰনেশ্যনেল চিনে ফেষ্টত ‘শ্ৰেষ্ঠ বিদেশী চলচ্চিত্ৰ বঁটা’ লাভ কৰিছিল। গোৱাৰ ভাৰত আন্ত:ৰাষ্ট্ৰীয় চলচ্চিত্ৰ মহোৎসৱত ভাৰতীয় পেনোৰামা শাখাত ছবিখন প্ৰদৰ্শিত হৈছিল।
মুম্বাইস্থিত প্ৰডাকশ্যন হাউছ ইণ্ডিয়া ষ্ট’ৰিছ আৰু সহ প্ৰযোজক কটকীৰ ধ্ৰুৱ ক্ৰিয়েটিভ প্ৰডাকশ্যন আৰু আমেৰিকা যুক্তৰাষ্ট্ৰ স্থিত প্ৰডাকশ্যন হাউছ কুৰ্মাসন ক্ৰিয়েটছে ছবিখন প্ৰযোজনা কৰিছে।
২০১৬ চনত লাভ ইন্টাৰনেশ্যনেল ফিল্ম ফেষ্টিভেল প্ৰতিষ্ঠা কৰিছে এগৰাকী কবি, নাট্যকাৰ তথা সমাজকৰ্মী আটা ছাৰৱটীয়ে। শিশুৰ বাবে কৰা তেওঁলোকৰ কৰ্মৰাজিৰ বাবে প্ৰথম বছৰটোত আমেৰিকা যুক্তৰাষ্ট্ৰৰ ফাৰ্ষ্ট লেডী মিছেল ওবামা আৰু লউৰা বুশ্বক ‘এম্বেছাদৰ অফ লাভ এণ্ড পীছ’ সন্মানেৰে সন্মানিত কৰা হৈছিল।
