নাগৰিকত্ব সংশোধনী বিধেয়কৰ মীমাংসাৰ পূৰ্বেই এই বছৰৰ ভিতৰতে স্বাক্ষৰিত হ’ব পাৰে বহু আকাংক্ষিত আলফা-চৰকাৰৰ শান্তি চুক্তি? এই সম্ভাৱনাৰ কথা নৰ্থ-ইষ্ট নাওৰ আগত প্ৰকাশ কৰিলে আলোচনাপন্থী আলফাৰ সভাপতি অৰবিন্দ ৰাজখোৱাই।
ৰাজখোৱাই আজি নতুন দিল্লীত আমাৰ সাংবাদিকৰ আগত কয় যে আলোচনা প্ৰক্ৰিয়াটোৰ অংশ হিচাপে কালি কেন্দ্ৰীয় চৰকাৰৰ সৈতে হোৱা হোৱা বৈঠকত প্ৰায়বোৰ বিষয়ত সহমতত উপনীত হ’ব পৰা গৈছে। “আলোচনাটো চূড়ান্ত পৰ্য্যায়ত আহি পাইছে।” এইবুলি তেওঁ গুৰুত্বপূৰ্ণ মন্তব্য কৰে।
উল্লেখযোগ্য যে অৰবিন্দ ৰাজখোৱাৰ নেতৃত্বত আলফাৰ এটা দলে কালি নতুন দিল্লীত কেন্দ্ৰীয় চৰকাৰৰ প্ৰতিনিধিৰ সৈতে আলোচনাত মিলিত হৈছিল, য’ত সংগঠনটোৰ সাধাৰণ সম্পাদক অনুপ চেতিয়া আৰু প্ৰচাৰ সম্পাদক মিথিংগা দৈমাৰীও আছিল। আলোচনাটোত কেন্দ্ৰীয় চৰকাৰৰ মধ্যস্থতাকাৰী এ বি মাথুৰ আৰু গৃহ দপ্তৰৰ যুটীয়া সচিব সত্যেন্দ্ৰ গাৰ্গে ভাগ লৈছিল।
“এই চুক্তিখন স্বাক্ষৰিত হ’লে আমি ভাৰতীয় সংবিধানৰ গণ্ডীৰ ভিতৰতে আমাৰ মাটি, অৰ্থনীতি আৰু ৰাজনৈতিক অধিকাৰ লাভ কৰিম।” ৰাজখোৱাই কয়।
আলফাৰ নেতাকেইজনে কয় যে তেওঁলোকে এই আলোচনাৰ কালত কেন্দ্ৰীয় চৰকাৰৰ প্ৰতিনিধিকেইজনৰ আগত নাগৰিকত্ব সংশোধনী বিধেয়কখনৰ বিৰোধিতাও প্ৰকাশ কৰে। যদিও নাগৰিকত্ব সংশোধনী বিধেয়কৰ কথাটো তেওঁলোকৰ মূল দাবী চনদত নাছিল, তথাপি তেওঁলোকে এইটো পিছত অন্তৰ্ভুক্ত কৰিছিল। “আমাৰ বাকীবোৰ দাবীৰ প্ৰায়বোৰতে সহমতত উপনীত হ’ব পৰা গৈছে।” ৰাজখোৱাই কয়।
আনহাতে আলফা (স্বাঃ)ৰ সেনাধ্যক্ষ পৰেশ বৰুৱা সন্দৰ্ভত ৰাজখোৱাই কয় যে পৰেশ বৰুৱা আলোচনালৈ আহিলে আলোচনাপন্থী আলফাৰ একো আপত্তি কৰিব লগীয়া নাই।
তেওঁ শান্তি চুক্তি সম্পাদিত হোৱাৰ পিছত আলফা সংগঠনটো ভংগ কৰা হ’ব বুলিও মন্তব্য কৰে।
