দুৰ্নীতি নিৰ্মূল কৰাৰ উদ্দেশ্য আগত ৰাখিয়ে সোণোৱালৰ নেতৃত্বত অসমত বি জে পি চৰকাৰ গঠন হৈছিল। চৰকাৰ গঠন কৰিয়েই মুখ্যমন্ত্ৰী সৰ্বানন্দ সোণোৱালে বিভিন্ন সময়ত দুৰ্নীতি নিবাৰণৰ বাবে কঠোৰ পন্থা হাতত লোৱা পৰিলক্ষিত হৈছিল। ঠিক সেইদৰে মুখ্যমন্ত্ৰীৰ নিৰ্দেশত মাজুলী, যোৰহাট আৰু লখিমপুৰক সংযোগ কৰাৰ উদ্দেশ্যে ব্ৰহ্মপুত্ৰ নদীৰ ওপৰত ১১০ কি.মি দৈৰ্ঘ্যৰ এখন দলঙ নিৰ্মাণৰ প্ৰকল্পৰ ঘোষনা কৰিছিল। ঘোষনা মৰ্মে প্ৰকল্পৰ কাম মেছাৰ্ছ ৱাডিয়া টেকন’ ইঞ্জিনিয়াৰিং ছাৰ্ভিছেজ লিমিটেড আৰু কোৰিয়াৰ মেছাৰ্ছ য়ুচিন ইঞ্জিনিয়াৰিং কৰ্পৰেচনক আৱন্টন দিছিল। কিন্তু প্ৰকল্প প্ৰতিবেদনৰ কামত গাফিলতি আৰু জালিয়তি কৰাৰ অভিযোগত মেছাৰ্ছ ৱাডিয়া টেকন’ ইঞ্জিনিয়াৰিং ছাৰ্ভিছেজ লিমিটেডৰ লগত ৰাজ্য চৰকাৰে চুক্তি বাতিল তথা কোম্পানীটোক ব্লেক লিষ্টেড কৰাৰ নিৰ্দেশ দিয়ে গড়কাপ্তানী বিভাগক। লগতে এই কোম্পানীটোৱে কোৰিয়াৰ কোম্পানীটোৰ চহী জাল কৰাৰো অভিযোগ উঠিছে। এই আটাইবোৰ অভিযোগৰ ভিত্তিতে মুখ্যমন্ত্ৰীয়ে এই নিৰ্দেশ দিয়ে আৰু জালিয়তিৰ অভিযোগ সন্দৰ্ভত ৰাজ্যৰ গড়কাপ্তানী বিভাগে মহানগৰীৰ চানমাৰী থানাত এটা গোচৰ ৰুজু কৰে। প্ৰকল্পৰ কাম কাজ চলাই নিয়াৰ বাবে বিভাগে নতুনকৈ নিবিদাৰ আহ্বান জনাইছে।
কামত গাফিলতি কৰাৰ বাবে মেছাৰ্ছ ৱাডিয়া টেকন’ ইঞ্জিনিয়াৰিং ছাৰ্ভিছেজ লিমিটেডৰ চুক্তি বাতিল
