বিশিষ্ট চলচ্চিত্ৰ পৰিচালক, লেখক, নাট্যকাৰ, অভিনেতা, সমাজসেৱক হেমেন দাসক প্ৰদান কৰা হৈছে জ্যোতিপ্ৰসাদ আগৰৱালা জীৱনজোৰা সাধনা সন্মান। দেওবাৰে গুৱাহাটীৰ মাছখোৱাস্থিত প্ৰাগজ্যোতি আই টি এ সাংস্কৃতিক প্ৰকল্পত অনুষ্ঠিত এক গাম্ভীৰ্যপূৰ্ণ অনুষ্ঠানত দাসক এই সন্মান প্ৰদান কৰে সদৌ অসম চলচ্চিত্ৰ প্ৰযোজক সন্থাই।
উল্লেখ্য যে, ৭০ খনতকৈ অধিক নাটক আৰু ৮ খন চলচ্চিত্ৰত অভিনয়, ১৭ খন নাট পৰিচালনা, যুঁজ, মৃগনাভি, আশ্ৰয় আদিকে ধৰি কেবাখনো ছবি পৰিচালনা, নাট আৰু অভিনয় সম্পৰ্কীয় কেবাখনো গ্ৰন্থ প্ৰণয়ন কৰি অসমৰ সাংস্কৃতিক জগতলৈ আগবঢ়োৱা বিশিষ্ট অৱদানৰ বাবে হেমেন দাসক এই সন্মান প্ৰদান কৰে চলচ্চিত্ৰ প্ৰযোজক সন্থাই।
এই অনুষ্ঠানতেই ২০১৭ বৰ্ষত ৰাষ্ট্ৰীয় আৰু আন্ত:ৰাষ্ট্ৰীয় প্ৰেক্ষাপটত সন্মান লাভ কৰা ছয়খন পূৰ্ণদৈৰ্ঘৰ ছবিৰ প্ৰযোজকক সম্বৰ্ধনা জ্ঞাপন কৰা হয়।
অনুষ্ঠানত প্ৰযোজকৰ এই সন্মান লাভ কৰে ‘দূৰণিৰ নিৰলা পঁজা’ৰ প্ৰযোজক সঞ্জীৱ নাৰায়ন, ‘চাকনৈয়া’ ছবিৰ বাবে মৃদুল ৰঞ্জন দাস, ‘অন্তৰীণ’ৰ বাবে মানবেন্দ্ৰ অধিকাৰী, ‘সোনাৰ বৰণ পাখি’ৰ বাবে বসন্ত বৰুৱা, ববী শৰ্মা বৰুৱা আৰু অসম চলচিত্ৰ আৰু বিত্ত নিগম, ‘শৈশৱতে ধেমালিতে’ ছবিৰ প্ৰযোজক মণ্ডলীৰ হৈ মুকুল গগৈ আৰু ‘গ্ৰীফ অন এ চানডে মৰ্ণিং (খাণ্ডৱ দাহ)’ ছবিৰ বাবে প্ৰযোজক অনু বৰুৱাই।
ইয়াৰ লগতে চুটিছবি ‘লিয়াকৎ’ৰ বাবে গোপাল জালান, ‘আচোঁৰ’ৰ বাবে জ্যোতিষ কুমাৰ নাথ আৰু ‘মেমৰিজ অৱ এ ফৰগেটন ৱাৰ’ৰ বাবে সুবিমল ভট্টাচাৰ্যক সম্বৰ্ধনা জনোৱা হয়।
অনুষ্ঠানত মুখ্য অতিথি হিচাপে উপস্থিত থাকি বিশিষ্ট লেখিকা পদ্মশ্ৰী ড: জয়শ্ৰী গোস্বামী মহন্তই কয়, ‘বহু কষ্টৰ মাজেৰে অসমীয়া চলচ্চিত্ৰই প্ৰাণ ধাৰণ কৰিছে। অসমীয়া চলচ্চিত্ৰ উদ্যোগটো ক’ত থমকি ৰৈছে, কিয় থমকি ৰৈছে সেই কথাখিনি চিনাক্ত কৰি উলিয়াই তাক সমাধান কৰাৰ পথত অগ্ৰসৰ হ’ব লাগে। তেতিয়াহে অসমীয়া চলচ্চিত্ৰৰ ক্ষেত্ৰখন উজ্জ্বল-সুজ্জ্বল-প্ৰজ্জ্বলিত হৈ থাকিব।‘
অনুষ্ঠানত বিশিষ্ট অভিনেতা তথা জ্যেষ্ঠ অধিবক্তা দীলিপ কুমাৰ হাজৰিকা, পৰিচালক পুলক গগৈ, দাৰা আহমেদ, জ্যোতি চিত্ৰবনৰ অধ্যক্ষ পবিত্ৰ মাৰ্ঘেৰিটা, অসম চলচিত্ৰ (বিত্ত আৰু উন্নয়ন) নিগমৰ অধ্যক্ষ অভিনেতা যতীন বৰা প্ৰমুখ্যে ভালেসংখ্যক বিশিষ্ট ব্যক্তি উপস্থিত থাকে।
