নতুন প্ৰত্যাহ্বান গ্ৰহণ কৰাৰ বাবে সাজু ‘ছিকিম মাৰাথন মানৱ’ ৰূপে পৰিচিত অমৰ চুব্বা। অহা ২৬ আৰু ২৭ মে’ত হায়দৰাবাদৰ গাচ্ছিবউলি ষ্টেডিয়ামত অনুষ্ঠিত হ’বলগীয়া ১২ ঘণ্টীয়া নৈশ মাৰাথন প্ৰতিযোগিতাত অংশগ্ৰহণৰ উদ্দেশ্যে বুধবাৰে হায়দৰাবাদলৈ ৰাওনা হয় খেলুৱৈগৰাকী। ২৬ মে’ৰ সন্ধিয়া ৭ বজাত আৰম্ভ হৈ ২৭ মে’ৰ ৰাতিপুৱা ৭ বজালৈ একেৰাহে অনুষ্ঠিত হ’ব এই দৌৰ প্ৰতিযোগিতা।
বাংগালোৰস্থিত নন-ষ্টপ এণ্টাৰটেইণমেণ্ট বিজনেছ স্প’ৰ্টছে আয়োজন কৰা আল্ট্ৰা মাৰাথন প্ৰতিযোগিতাখনত দেশৰ কেৱল নিৰ্বাচিত এথলীটসকলেহে অংশগ্ৰহণৰ সুযোগ লাভ কৰিছে।
উল্লেখ্য যে তিনিবছৰৰ মূৰত ১২ ঘণ্টীয়া ষ্টেডিয়াম দৌৰ প্ৰতিযোগিতাত অংশ ল’বলৈ ওলোৱা ৫০ বছৰীয়া চুব্বাৰ জীৱনৰ এয়াই প্ৰথম নৈশ দৌৰ প্ৰতিযোগিতা। ১২ ঘণ্টীয়া ষ্টেডিয়াম দৌৰ প্ৰতিযোগিতাত ১২ বছৰ আগতে বাংগালোৰত অভিষেক কৰি প্ৰতিযোগিতাখনত চুব্বাই ১২ ঘণ্টাত মুঠ ৯৬ কিলোমিটাৰ দূৰত্ব অতিক্ৰম কৰি তৃতীয় স্থান অধিকাৰ কৰিছিল। তাৰ পাছত ২০১৫ত মুম্বাইত অনুষ্ঠিত হোৱা ১২ ঘণ্টীয়া ষ্টেডিয়াম দৌৰত তেওঁ ৯৫.৬ কিলোমিটাৰ দূৰত্বৰে পঞ্চম স্থান দখল কৰিছিল। ইয়াৰ উপৰি চুব্বাই যোৱা বছৰ বাংগালোৰত অনুষ্ঠিত হোৱা ২৪ ঘণ্টীয়া ষ্টেডিয়াম দৌৰতো অংশগ্ৰহণ কৰিছিল যদিও আঘাতৰ বাবে আধাতে প্ৰতিযোগিতা সামৰিছিল।
‘গোটেই ৰাতিটো দৌৰা মোৰ বাবে এয়া নতুন প্ৰত্যাহ্বান। দেশৰ আগশাৰীৰ আল্ট্ৰা মাৰাথনবিদসকলৰ উপস্থিতিত দৌৰাটো ইমান সহজ নহয়। মই মোৰ নিজৰ শ্ৰেষ্ঠ প্ৰদৰ্শন ৯৬ কিলোমিটাৰৰ অভিলেখ ভংগ কৰি প্ৰতিযোগিতাখনত তিনিটা স্থানৰ ভিতৰত থাকিবলৈ প্ৰয়াস কৰিম’। গেংটকত আয়োজিত সংবাদমেলত এইদৰে কয় চুব্বাই।
উল্লেখ্য যে এই প্ৰতিযোগিতাখনত অংশগ্ৰহণ কৰাৰ পূৰ্বে তেওঁ কঠোৰ অনুশীলনত ব্যস্ত আছিল। আৰু তেওঁ অনুশীলনৰ সময়ত ১২ ঘণ্টাত ৬০ কিলোমিটাৰ দূৰত্ব অতিক্ৰম কৰিছে।
গভীৰ আত্মবিশ্বাসেৰে তেওঁ কয়, ‘ৰাজ্যৰ লগতে দেশৰ নৱপ্ৰজন্মক উৎসাহিত কৰাৰ বাবেই মই এনেধৰণৰ প্ৰতিযোগিতাত অংশগ্ৰহণ কৰি আছো।‘
ইয়াৰ উপৰি প্ৰতিযোগিতাখনত অংশগ্ৰহণৰ বাবে আমন্ত্ৰণ জনোৱা আয়োজক গোষ্ঠী আৰু তেওঁক সকলো ক্ষেত্ৰতে উৎসাহিত কৰা সমৰ্থকসকলক ধন্যবাদ জনায়।
