নগাঁও জিলাৰ বঢ়মপুৰ বিধানসভা সমষ্টিৰ অন্তৰ্গত মহখুলিত নিৰ্মাণ কাৰ্য চলি থকা নগাঁও মেডিকেল কলেজৰ কাম কাজৰ অগ্ৰগতিৰ বুজ ল’বলৈ শনিবাৰে ম’হখুলিত উপস্থিত হয় প্ৰাক্তন মুখ্যমন্ত্ৰী তথা বঢ়মপুৰ সমষ্টিৰ বিধায়ক প্ৰফুল্ল কুমাৰ মহন্ত।
নিৰ্মাণ কাৰ্যৰ অগ্ৰগতিৰ বুজ লৈ সংবাদ মাধ্যমৰ আগত জানিবলৈ দিয়ে যে অহা দুবছৰৰ ভিতৰত মেডিকেল কলেজখনৰ নিৰ্মাণ কাৰ্য সম্পূৰ্ণ হৈ উঠিব। তেওঁ এই সন্দৰ্ভত স্বাস্থ্য আৰু বিত্ত মন্ত্ৰী ডঃ হিমন্ত বিশ্ব শৰ্মাৰ লগত আলোচনা কৰাৰ কথা উল্লেখ কৰি কয় যে এই চিকিৎসা মহাবিদ্যালয়খনে নগাঁও জিলাকে ধৰি মধ্য অসমৰ জিলা কেইখনৰ লগতে পাহাৰীয়া জিলাখনৰ ৰাইজক উপকৃত কৰিব।
নিৰ্মাণ কাৰ্যৰ লগত জড়িত ঠিকাদাৰ আদিয়ে জানিবলৈ দিয়া মতে ইতিমধ্যে ১১২ বিঘা মাটিত নিৰ্মাণ কাৰ্য চলি থকা মেডিকেল কলেজখনৰ ২৫ শতাংশ কাম সম্পূৰ্ণ হৈছে।
আনহাতে, সংবাদ মাধ্যমৰ আগত মহন্তই জানিবলৈ দিয়ে যে, তেওঁৰ সমষ্টিৰ এটা পথৰ বাবে আবন্টিত ধন কৰ্তন কৰি বিশ্বনাথ চাৰিআলিলৈ লৈ যায়। এই কাৰ্যৰ অন্তৰালত এজন সাংসদ জড়িত আছে বুলি উল্লেখ কৰে যদিও সাংসদগৰাকীৰ নাম উল্লেখ কৰাৰ পৰা বিৰত থাকে। এই সম্পৰ্কত মহন্তই সমষ্টিৰ বিভিন্ন বাট-পথৰ উন্নয়ন বিছাৰি প্ৰধানমন্ত্ৰী নৰেন্দ্ৰ মোডীলৈ পত্ৰ প্ৰেৰণ কৰাৰ কথা উল্লেখ কৰে।
অৱশ্যে এইবাৰ মুখ্যমন্ত্ৰী সৰ্বানন্দ সোণোৱাল আৰু গড়কাপ্তানি মন্ত্ৰী হিমন্ত বিশ্ব শৰ্মাই বঢ়মপুৰ সমষ্টিৰ জহিখহি যোৱা পথসমূহ নিৰ্মাণৰ ব্যৱস্থা কৰিব বুলি দিয়া প্ৰতিশ্ৰুতিকলৈ আশাবাদী প্ৰাক্তন মুখ্যমন্ত্ৰী মহন্ত ৷
উল্লেখ্য যে, নিৰ্মাণ কাৰ্য বুজ ল’বলৈ গৈ মহন্তই দায়িত্বত থকা বিষয়া-কৰ্মচাৰী, ঠিকাদাৰ আদিৰ লগত আলোচনাত মিলিত হয়। আলোচনাৰ সময়ত বিষয়া কৰ্মচাৰী সকলে মহন্তক মেডিকেল কলেজখনৰ কাম কাজৰ সম্পূৰ্ণ খতিয়ান দাঙি ধৰাৰ লগতে ভৱিষ্যত পৰিকল্পনাৰ বিষয়ে বহলাই কয়।
এই কাৰ্যসূচীত অগপৰ নগাঁও জিলা সমিতিৰ সভাপতি অতুল মেধি, সম্পাদক নিৰঞ্জন বৰা আদি উপস্থিত থাকে।
