অতি বিতৰ্কিত তথা অসমীয়া জাতিৰ ভৱিষ্যতৰ প্ৰশ্ন জড়িত হৈ থকা নাগৰিকত্ব সংশোধনী বিধেয়ক সন্দৰ্ভত কেন্দ্ৰ আৰু ৰাজ্যত থকা বিজেপি চৰকাৰে অসমৰ মানুহক ইয়াৰ সম্পৰ্কত নিজৰ মত প্ৰদানৰ সাংবিধানিক অধিকাৰৰ পৰা বঞ্চিত কৰাৰ বাবে কৌশল ৰচনা কৰিছে। বিধেয়কখন সন্দৰ্ভত অসমীয়া ৰাইজ তথা দল-সংগঠনৰ মতামত লোৱ হ’ব আৰু তাৰ বাবে ইয়াৰ বাবে গঠিত যুটীয়া সংসদীয় কমিটিখন অসমলৈ আহিব বুলি পূৰ্বে কেন্দ্ৰীয় চৰকাৰ তথা ৰাজ্য চৰকাৰে আশ্বাস দি আহিছিল যদিও এতিয়া পাভলুটি মাৰি দিল্লীতে যুটীয়া সংসদীয় কমিটিয়ে এখন পৰ্য্যালোচনা বৈঠক অনুষ্ঠিত কৰি অসমৰ দল-সংগঠনক তাতহে মত দিবলৈ আমন্ত্ৰণ কৰিছে।
জানিব পৰামতে, অসমৰ ২৮টা দল-সংগঠনক অহা ১২ এপ্ৰিলত তেওঁলোকৰ মত প্ৰদান কৰিবৰ বাবে আমন্ত্ৰণ জনাইছে। কিন্তু প্ৰশ্ন হয়, অসমৰ ৰাইজৰ মতামত ল’বলৈ অসমলৈ আহিব বুলি কোৱা সংসদীয় কমিটিয়ে কিয় অসমলৈ অহাৰ কাৰ্য্যসূচী বাৰে বাৰে বাতিল কৰিছে? এই কমিটিখন সঁচা আন্তৰিকতাৰে অসমৰ মানুহৰ মত লোৱাৰ স্থিতিত আছে নে? নে অসমৰ ৰাইজক দেখুৱাই এখন ভেকো ভাওনা পাতিছে? আনহাতে ৩ এপ্ৰিলৰ দিনা অসমৰ বিজেপিৰ সাংসদ তথা এই সংসদীয় কমিটিৰ এজন ৰমেন ডেকাই সংবাদ মাধ্যমৰ আগত কৈছিল যে বাৰ এপ্ৰিলৰ পিছত কমিটিখন অসমলৈ যাব। কিন্তু যদি বাৰ এপ্ৰিলৰ পিছত কমিটিখন অসমলৈ আহেই তেন্তে অসমতে মতামত লোৱা হ’ব বুলি দিয়া প্ৰতিশ্ৰুতি আওকাণ কৰি কিয় দিল্লীলৈ মতামত দিবৰ বাবে সংগঠনবোৰক মতা হৈছে? আনহাতে মুখ্য মন্ত্ৰী সৰ্বানন্দ সোণোৱালেও পূৰ্বে এই কমিটিখনে অসমৰ ৰাইজৰ মতামত ল’বলৈ অসমলৈ আহিব বুলি প্ৰতিশ্ৰুতি দিছিল। সেই প্ৰতিশ্ৰুতিৰ কি হ’ল? অসমৰ এটা জ্বলন্ত সমস্যা সম্পৰ্কত সিদ্ধান্ত লোৱাৰ পূৰ্বে ৰাজ্যখনৰ নাগৰিকৰ মতামতক কৌশলেৰে এৰাই চলিব বিচৰা হৈছে নেকি বুলি সচেতন নাগৰিকসকলে প্ৰশ্ন কৰিছে।
উল্লেখযোগ্য যে কেন্দ্ৰৰ বিজেপিৰ চৰকাৰখনে নাগৰিকত্ব সংশোধনী বিধেয়ক, ২০১৬ৰ জৰিয়তে চুবুৰীয়া ৰাষ্ট্ৰবোৰৰ পৰা ২০১৪ চন পৰ্য্যন্ত ভাৰতলৈ অহা ভগনীয়া হিন্দু লোকসকলক নাগৰিকত্ব দিয়াৰ কৌশল লৈছে, যিটোৱে অসমত থকা লাখ লাখ হিন্দু নাগৰিকক বৈধ নাগৰিকত পৰিণত কৰিব আৰু অসমৰ ভাষা-সংস্কৃতিৰ প্ৰতি এক ডাঙৰ ভাবুকি থিয় কৰাব। আনহাতে এই নাগৰিকত্ব বিধেয়ক গৃহীত হ’লে অসম চুক্তিৰ দেখদেখকৈ অৱমাননা হ’ব। কাৰণ অসম চুক্তিৰ মতে ১৯৭১ চনৰ ২৫ মাৰ্চ পিছত অহা সকলো বিদেশী নাগৰিকেই অবৈধ। ধৰ্মৰ বিচাৰত নাগৰিকৰ বৈধতা নিৰ্ণয়ৰ যি সিদ্ধান্ত কেন্দ্ৰীয় চৰকাৰখনে গ্ৰহণ কৰিবলৈ ওলাইছে সি অসম চুক্তিক অৰ্থহীন কৰি তুলিব।
