এটা ৰায়দানে তেওঁক জনসাধাৰণৰ মাজত বিখ্যাত কৰি তুলিছে। উচ্চতম ন্যায়ালয়ৰ ন্যায়াধীশ বিক্ৰম নাথে নিজেই এই কথা কৈছে। তেওঁৰ ভাষাত, ‘ৰাস্তাৰ কুকুৰৰ ৰায়দানে মোক সমগ্ৰ বিশ্বৰ নাগৰিক সমাজত বিখ্যাত কৰি তুলিছে!’
উল্লেখ্য যে, আদালত কক্ষৰ ভিতৰে-বাহিৰে লঘু ঠাট্টা-বিদ্ৰুপৰ বাবে ন্যায়াধীশগৰাকীৰ ভাল নাম আছে। সেইদৰে তেওঁক ৰাস্তাৰ অঘৰী কুকুৰৰ প্ৰতি কৃতজ্ঞতা প্ৰকাশ কৰা দেখা গ’ল।
প্ৰসংগক্ৰমে ১১ আগষ্টত উচ্চতম ন্যায়ালয়ৰ দুজনীয়া ন্যায়াধীশৰ খণ্ড বিচাৰপীঠে ৰায় দিছিল যে দিল্লী আৰু ইয়াৰ আশে-পাশে থকা অঞ্চলত অঘৰী কুকুৰবোৰক বাহিৰলৈ ওলাবলৈ দিয়া উচিত নহয়। এই ৰায় ৰাজহুৱা হোৱাৰ পিছত নাগৰিক সমাজত হুলস্থুলৰ সৃষ্টি হয়। পশুপ্ৰেমীয়ে ৰাজপথলৈ ওলাই আহি আন্দোলন আৰম্ভ কৰে।
ইয়াৰ পিছতে গোচৰটো তিনিজনীয়া বিশেষ বিভাগীয় বিচাৰপীঠলৈ যায়। এই বিভাগীয় বিচাৰপীঠৰ মুৰব্বী আছিল ন্যায়াধীশ বিক্ৰম নাথ। ২২ আগষ্টত তেওঁৰ বিচাৰপীঠে ১১ আগষ্টৰ ৰায়টো সংশোধন কৰে।
শেহতীয়াকৈ কেৰালাৰ তিৰুৱনন্তপুৰমত মানৱ-বন্যপ্ৰাণী সংঘাতৰ ওপৰত এখন আঞ্চলিক সন্মিলনৰ আয়োজন কৰা হৈছিল। ৰাষ্ট্ৰীয় আইন সেৱা প্ৰাধিকৰণে আয়োজন কৰা সন্মিলনত ভাষণ দি ন্যায়াধীশ নাথে এই বিষয়টো উত্থাপন কৰে। তাত তেওঁ ভাৰতৰ মুখ্য ন্যায়াধীশ বি আৰ গাভাইৰ বিষয়েও কয়। ন্যায়াধীশ নাথে এই গোচৰটো তেওঁৰ বিচাৰপীঠত দিয়াৰ বাবে মুখ্য ন্যায়াধীশগৰাকীক কৃতজ্ঞতা জ্ঞাপন কৰে। ২০২৭ চনত ন্যায়াধীশ বিক্ৰম নাথ দেশৰ মুখ্য ন্যায়াধীশ হোৱাৰ সম্ভাৱনা আছে।
তেওঁ কয়, ‘বহুদিন ধৰি আইনী জগতত মই মোৰ অদ্ভুত কামৰ বাবে পৰিচিত হৈ আহিছো। কিন্তু মই অঘৰী কুকুৰবোৰৰ প্ৰতিও কৃতজ্ঞ। কাৰণ সিহঁতে মোক কেৱল এইখন দেশতে নহয় সমগ্ৰ বিশ্বৰ নাগৰিক সমাজত স্বীকৃতি দিছে। আমাৰ মুখ্য ন্যায়াধীশৰ ওচৰতো মই কৃতজ্ঞ, কাৰণ তেওঁ মোক এই গোচৰটোৰ দায়িত্ব দিছিল।
