শুকুৰবাৰে কোকৰাঝাৰ আৰু চিৰাঙত বজ্ৰপাতত এটি ৫ বছৰীয়া শিশু নিহত হোৱাৰ লগতে আন ৬ জন ব্যক্তি গুৰুতৰভাৱে আহত হয়।
আঞ্চলিক বতৰ বিজ্ঞান কেন্দ্ৰই নামনি অসমত প্ৰতি ঘণ্টাত ৫০ কি. মি. বেগত ধুমুহা অহাৰ লগতে বৰুষুণ হ’ব বুলি ভৱিষ্যদ্বাণী কৰি জিলা প্ৰশাসনক সজাগ হৈ থাকিবলৈ কৈছিল।
উল্লেখযোগ্য যে শুকুৰবাৰে কোকৰাঝাৰ জিলাৰ চেৰফানগুৰি আৰক্ষী চকীৰ অধীনৰ লাক্ৰিগুৰি গাঁৱত বজ্ৰপাতত এটি শিশু নিহত হোৱাৰ লগতে চিৰাং জিলাৰ ৰুনিখাটা আৰক্ষী চকীৰ অধীনৰ মধ্য শালবাৰী গাঁৱত অন্য তিনিজন ব্যক্তি গুৰুতৰভাৱে আহত হয়।
বজ্ৰপাতত নিহত হোৱা শিশুটি জংচৰ নাৰ্জাৰী (৫) বুলি চিনাক্ত কৰাৰ লগতে শিশুটি ইউ এন একাডেমমীত অধ্যয়ন কৰিছিল বুলি জানিব পৰৈ গৈছে। আনহাতে আন ৩ জন গুৰুত্বপূৰ্ণভাৱে আহত ব্যক্তিক তাৎক্ষণিকভাৱে কোকৰাঝাৰ আৰ এন ব্ৰহ্ম অসামৰিক হস্পিতালত চিকিৎসাৰ বাবে ভৰ্তি কৰায়। গুৰুতৰভাৱে আহত কেইজন হ’ল দানসৌৰাং বসুমতাৰী(৫), ৰোমাইনা বসুমতাৰী (১৩) আৰু পাৰ্বতী নাৰ্জাৰী (৪৫)।
আনহাতে চিৰাং জিলাৰ ৰুনীখাটা আৰক্ষী চকীৰ অধীনৰ মধ্য শালবাৰী গাঁৱৰ ৰবিৰাম ব্ৰহ্ম (২৬), গালা মাছাহাৰী(২৯) আৰু অজয় লিম্বু নামৰ ব্যক্তিকেইজনো বজ্ৰপাতত আঘাতপ্ৰাপ্ত হোৱা বুলি জানিব পৰা গৈছে।
জানিব পৰা মতে ব্যক্তিকেইজনে আন ৬ জন ব্যক্তিৰ সৈতে ঘৰৰ বাৰাণ্ডাত বহি থকা অৱস্থাতে তেওঁলোক বজ্ৰপাতত আহত হয়।
