জনজাতিকৰণৰ দাবীত আজি কোচ ৰাজবংশী সন্মিলনীয়ে গোসাঁইগাঁৱৰ চৌতাৰাত লোৱা ৰে’লপথ অৱৰোধৰ কাৰ্য্যসূচীৰ সময়ত উত্তপ্ত পৰিস্থিতিৰ সৃষ্টি হয়। অৱৰোধকাৰীসকলে ৰে’লপথৰ ওপৰত বহি থকাত আজি ৰে’ল যাতায়াত বিঘ্নিত হয়। কেইবাখনো ৰে’লৰ চলাচল বাতিল কৰিব লগীয়া হোৱাৰ লগতে কেইবাখনো ৰে’ল আদবাটতে ৰাখি থ’ব লগীয়া হয়।
অৱৰোধকাৰীসকলক বুজাই-বঢ়াই ৰে’ল পথৰ পৰা আঁতৰাই পঠিয়াবলৈ ব্যৰ্থ হোৱাৰ পিছত আৰক্ষীয়ে লাঠীচালনাৰ লগতে কন্দুৱা গেছ প্ৰয়োগ কৰিবলৈ বাধ্য হয়।
ৰে’ল অৱৰোধৰ বাবে উজনিমুৱা কামাখ্যা ইণ্টাৰচিটি এক্সপ্ৰেছ আৰু নামনিমুৱা বি জি যাত্ৰীবাহী ৰে’ল বাতিল কৰিব লগীয়া হয় বুলি জানিব পৰা গৈছে। ইয়াৰ লগতে নিউ কোচবিহাৰ ষ্টেইশ্যন আৰু কোকৰাঝাৰ ষ্টেইশ্যনত আবদ্ধ হৈ থাকে কেইবাখনো ৰে’ল।
উল্লেখযোগ্য যে ছয় জনগোষ্ঠীক ছমাহৰ ভিতৰতে জনজাতিকৰণ কৰা হ’ব বুলি বিজেপিৰ নিৰ্বাচনী প্ৰতিশ্ৰুতিত ভোল গৈ ইমান দিনে মনে মনে থকা ছয় জনগোষ্ঠীৰ প্ৰতিনিধিসকলে পুনৰ আন্দোলনৰ পথ ল’বলৈ বাধ্য হৈছে। যোৱা ২০ জুলাইলত নতুন দিল্লীত এই বিষয়টোত হোৱা ত্ৰিপাক্ষিক বৈঠকত বিজেপিৰ প্ৰতিশ্ৰুতি ভুৱা বুলি জানিব পাৰি ক্ষুব্ধ হৈ পৰা ৬টা জনগোষ্ঠীৰ প্ৰতিনিধিসকলে যোৱা ২৩ জুলাইত অসম বন্ধৰ আহ্বান দিছিল। তাৰ পিছতো জনগোষ্ঠীকেইটাই পৃথকে পৃথকে কেইবাটাও আন্দোলনৰ কাৰ্য্যসূচী লৈ আহিছে।
