বগীধলা চাহ বাগিচাৰ মালিক ভাতৃদ্বয় সুধীৰ ৰয় আৰু সমীৰ ৰয়ক গুৱাহাটী উচ্চ ন্যায়ালয়ে জামিন মঞ্জুৰ কৰাৰ পিছতে বাগিচাখনৰ মজদুৰসকল পুনৰ ক্ষুব্ধ হৈ পৰে।
বুধবাৰে দিনত চাহ বাগিচাখনৰ কলঘৰৰ সন্মুখত প্ৰায় শতাধিক লোকে উচ্চ ন্যায়ালয়ে মঞ্জুৰ কৰা জামিনৰ বিৰুদ্ধে উত্তাল প্ৰতিবাদ সাব্যস্ত কৰে।
শ্ৰমিকসকলে কলঘৰৰ সন্মুখত বহি লৈ সুধীৰ ৰয়, সমীৰ ৰয় মুৰ্দাবাদ, আমাক ন্যায় প্ৰদান কৰক, অসম চৰকাৰৰ হায় হায়, বাগিচাৰ দায়িত্ব আনক প্ৰদান কৰক আদি বিভিন্ন শ্লোগান আওৰাই উত্তেজনাময় পৰিৱেশৰ উদ্ভৱ কৰে।
ইফালে বাগিচাখনৰ একাংশ চাহ মজদুৰে অভিযোগ উত্থাপন কৰি কয় যে শ্ৰমিকসকলে শ্ৰমদানৰ বিনিময়ত নিজৰ পাবলগীয়া প্ৰাপ্য বিচাৰি যাওঁতে মালিকপক্ষই প্ৰাপ্যৰ বিনিময়ত দিলে গুলী। ইমানবোৰ ঘটি যোৱাৰ পিছতো চৰকাৰে শ্ৰমিকসকলৰ প্ৰতি অলপো গুৰুত্ব প্ৰদান নকৰিলে।
লক্ষ্যণীয় যে শ্ৰমিকসকলৰ সমস্যা সমূহ সমস্যা হৈয়ে থাকিল। কিয়নো অসম শক্তি বিচতৰণ কোম্পানীয়েও চাহ বাগিচাখনৰ শ্ৰমিকৰ বাসগৃহসমূহত থকা বিজুলীৰ সংযোগো কৰ্তন কৰিছে। এই সমূহ কাৰণতে শ্ৰমিকসকল ক্ষুব্ধ হৈ পুনৰ প্ৰতিবাদ সাব্যস্ত কৰা দেখা যায়।
বাগিচাৰ মালিকপক্ষই বৰ্বৰ আক্ৰমণ কৰাৰ পিছতো জিলা প্ৰশাসনৰ সোপাঢিলা নীতিৰ বাবে মালিক ভাতৃদ্বয় উচিত শাস্তিৰ পৰা বঞ্চিত হোৱা বুলি আন একাংশ ক্ষুব্ধ শ্ৰমিকে মন্তব্য কৰে।
আনহাতে গোলাঘাট আটছাৰ শাখা সমিতিৰ নেতা নুৰুল আলীয়ে অতিশীঘ্ৰে চাহ বাগিচাখনৰ মালিকীস্বত্ব ৰয় ভাতৃদ্বয়ৰ পৰা আনক অৰ্পণ কৰা আৰু বাগিচাখনত তেওঁলোকৰ প্ৰৱেশ নিষিদ্ধ কৰিবৰ বাবে দাবী জনায়।
এইসমূহ দাবী মানি নচলিলে আটছাই পুনৰ তীব্ৰ প্ৰতিবাদ গঢ়ি তুলিব বুলি হুংকাৰ দিয়ে।
উল্লেখযোগ্য যে যোৱা বছৰৰে ১৩ ডিচেম্বৰত গোলাঘাট জিলাৰ বগীঢলা চাহ বাগিচাখনৰ মালিক পক্ষই শ্ৰমিকৰ ওপৰত বৰ্বৰ আক্ৰমণ চালাইছিল।
বাগিচাখনৰ কিছু সংখ্যক শ্ৰমিকে নিজৰ প্ৰাপ্য মজুৰি বিচাৰি মালিক সমীৰ ৰয় আৰু সুধীৰ ৰয়ৰ লগত আলোচনাত মিলিত হৈ থকা সময়তে পৰিস্থিতি উত্তপ্ত হৈ পৰিছিল।
পৰিস্থিতিৰ খবৰ পায় ঘটনাস্থলীত নুমলীগড় আৰক্ষী উপস্থিত হৈছিল যদিও আৰক্ষী বিষয়াৰ উপস্থিতিতে মালিকদ্বয়ে শ্ৰমিকসকলৰ ওপৰত গুলী চালনা কৰে যাৰ ফলত ১৪ জন লোক গুৰুতৰভাবে আঘাত প্ৰাপ্ত হৈছিল।
