আইন অনুসৰি যোগ্য বিবেচিত ৩২ হাজাৰ শিক্ষক কৰ্মচাৰীক অতিশীঘ্ৰে প্ৰাদেশীকৰণ কৰা আৰু প্ৰাদেশীকৰণ আইনৰ ব্যাপক সংশোধনৰ দাবীত অসম শিক্ষক কৰ্মচাৰীৰ আহ্বানত সোমবাৰে ৰূপায়ন কৰা ধৰ্মঘট কাৰ্যসূচী অনুসৰি বৰপেটাতো ভেঞ্চাৰ শিক্ষানুষ্ঠানৰ শিক্ষক কৰ্মচাৰীয়ে ৰূপায়ন কৰে তিনিঘণ্টীয়া অৱস্থান ঘৰ্মঘট।
উপায়ুক্তৰ কাৰ্যালয়ৰ সন্মুখত দিনৰ এঘাৰ বজাৰ পৰা ৰূপায়ন কৰা ধৰ্মঘট কাৰ্যসূচীত জিলাখনৰ বিভিন্ন প্ৰান্তৰ পাঁচ শতাধিক শিক্ষক কৰ্মচাৰীয়ে অংশগ্ৰহণ কৰি চৰকাৰ বিৰোধী শ্লোগান দিয়ে।
কাৰ্যসূচীতডি ৱাই এফ আইৰ প্ৰাক্তন ৰাজ্যিক সভাপতি পিয়াৰুল ইছলামে উপস্থিত থাকি কয় যে, আন্দোলন কৰি মুখ্যমন্ত্ৰী হোৱা সৰ্বানন্দ সোণোৱালে এতিয়া আন্দোলনকাৰীৰ কথা নুশুনিনাগপুৰৰ নিৰ্দেশত কাম কৰি আছে ৷ মুখ্যমন্ত্ৰীৰ এনে ভুমিকাৰ বাবেই দুৰ্ভগীয়া শিক্ষক কৰ্মচাৰীৰ জীৱনৰ কোনো পৰিবৰ্তন হোৱা নাই বুলিও তেওঁ উল্লেখ কৰে ৷
ধৰ্মঘটস্থলীত ঐক্যমঞ্চৰ কেন্দ্ৰীয় সমিতিৰ কাৰ্যকৰী সভাপতি ছাবেদ ভূঞা, জিলা সমিতিৰ মুখ্য সম্পাদক আৰু যুটীয়া সম্পাদক ক্ৰমে আমিৰুল ইছলাম আৰু পুলেন্দ্ৰ দাসেও ভাষণ প্ৰদান কৰে৷ ধৰ্মঘটৰ অন্তত জিলা উপায়ুক্তৰ জৰিয়তে ৰাজ্যপাল, মুখ্যমন্ত্ৰী আৰু শিক্ষামন্ত্ৰীলৈ স্মাৰক পত্ৰ প্ৰেৰণ কৰে ৷
