পুৰণিগুদামত অব্যাহত থকা শতবছৰ গৰকা বৰ মছজিদৰ ঐতিহাসিক মিনাৰ স্থানান্তৰকৰণৰ বিৰল দৃশ্য নিজ চকুৰে প্ৰত্যক্ষ কৰিবৰ বাবে অসমৰ বিভিন্ন প্ৰান্তৰ লোকে নগাঁৱৰ পুৰণিগুদামত ভিৰ কৰিছেহি।
পূৰ্বতে নোহোৱা এনে পৌৰাণিক কীৰ্তিস্তম্ভ স্থানান্তৰকৰণ প্ৰক্ৰিয়া ওপৰত পৰ্য্যবেক্ষণ কৰিবৰ বাবে চৰকাৰৰ গড়কাপ্তানি বিভাগেও প্ৰেৰণ কৰিছে বিভাগীয় কৰ্মচাৰী তথা কাৰিকৰী অভিযন্তা। এইসূত্ৰে চৰকাৰী নিৰ্দেশ মৰ্মে যোৰহাট গড়কাপ্তানি বিভাগৰ যান্ত্ৰিক ক্ষেত্ৰৰ দুই কাৰিকৰী বিষয়া ইতিমধ্যেই পূৰ্বৰ স্থানৰ পৰা প্ৰায় ৪৫ ফুট স্থানান্তৰ হোৱা মিনাৰটোৰ পুংখানুপুংখ পৰ্য্যবেক্ষণ কৰি তথ্য আহৰণ কৰে যাতে ভৱিষ্যতে অসমত প্ৰয়োজনবসত চৰকাৰী ভাবে কোনো প্ৰাচীন কীৰ্তিস্তম্ভ তথা চৰকাৰী আবাস পুনঃসংস্থাপিত কৰিব পৰা যায়।
ইফালে অসমৰ বিভিন্ন ঠাইৰ বিভিন্ন জনৰ লগতে গুৱাহাটী বিশ্ববিদ্যালয়ৰ প্ৰাক্তন উপাচাৰ্য্য নিৰ্মল চৌধুৰীয়ে গুৱাহাটীৰ পৰা আহি এই বিৰল দৃশ্য পৰিদৰ্শন কৰি উৎফুল্লিত হৈ পৰাৰ লগতে ঐক্য-সম্প্ৰীতিৰ প্ৰতীক স্বৰূপে শতবছৰ ধৰি পুৰণিগুদামত শিৰ উচ্চ কৰি থকা মিনাৰটোৰ উচিত সংৰক্ষণৰ বাবে সমূহ ৰাইজে কৰা ঐক্যান্তিক প্ৰচেষ্টাৰ বাবে অশেষ কৃতজ্ঞতা জ্ঞাপন কৰে।
উল্লেখযোগ্য যে ১৯০২ চনতে স্থানীয় ছাজিদুৰ ৰহমান নামৰ এজন লোকৰ মাতৃৰ আৰ্থিক অনুদানৰে বৰ্তমানৰ বাংলাদেশৰ ঢাকাৰ এজন প্ৰসিদ্ধ ৰাজমিস্ত্ৰীৰ তত্ত্বাৱধানত ৰংঘৰ আৰু কামাখ্যা মন্দিৰৰ আৰ্হিত নিৰ্মাণ হৈছিল মিনাৰটো। কিন্তু এই মিনাৰটোৰ নিৰ্মাণ কাৰ্যত ব্যৱহাৰ হোৱা নাছিল লোৰ ৰদ, চিমেণ্টৰ ঠাইত ব্যৱহাৰ কৰিছিল হাঁহকণী, মাটিমাহ, বৰা চাউল, ধূণা আদিৰ মিশ্ৰন।
অৱশ্যে এতিয়াও প্ৰায় ৩৫ ফুট স্থানান্তৰকৰণৰ প্ৰক্ৰিয়া বাকী যাৰ বাবে প্ৰয়োজন অধিক অৰ্থৰ। গতিকে এই ঐতিহাসিক ঘটনাৰ অংশীদাৰ হ’বৰ বাবে অসমৰ ইচ্ছুক শুভাকাংক্ষীক পুৰণিগুদাম স্থিত UBI-ৰ একাউণ্ট নম্বৰ 0640010335300-ত (IFSC: UTBI0PGMG11) আৰ্থিক অনুদান আগবঢ়াব পৰাকৈও সুবিধা কৰিছে সামগ্ৰিকভাবে মিনাৰ স্থানান্তৰকৰণৰ উদ্যোগ হাতত লোৱা স্থানীয় অঞ্জুমান-ই-ইছলামীয়াৰ কৰ্তৃপক্ষই।
লগতে বতৰ ঠিক থাকিলে আগন্তুক এসপ্তাহৰ ভিতৰতে নিৰ্ধাৰিত স্থানত মিনাৰটো সংস্থাপিত কৰিব পৰা যাব বুলি জানিবলৈ দিয়ে অঞ্জুমান-ই-ইছলামীয়াৰ বিষয়ববীয়াই।
