চলচ্চিত্ৰৰ মাধ্যমেৰে সাধাৰণ ভাৰতীয় মানুহৰ বিভিন্ন সমস্যাক তুলি ধৰা চলচ্চিত্ৰ পৰিচালক জাহ্নু বৰুৱাই চলচ্চিত্ৰ উদ্যোগটোৰ বহুতো কথাৰ সৈতে যে একমত নহয়, তেওঁৰ কৰ্মৰাজিৰ মাজেৰে সদায় দেখুৱাই আহিছে।
দেশত আৰু দেশৰ বাহিৰতো চলচ্চিত্ৰৰ ভাষা বুজি পোৱা দৰ্শক-সমালোচকৰ প্ৰশংসা লাভ কৰা পৰিচালকগৰাকীয়ে চলচ্চিত্ৰ উদ্যোগটোৰ ‘চলচ্চিত্ৰ কেবল আমোদৰ বাবে’ ধাৰণাৰ সৈতে কোনো দিন একেমত নাছিল। এক আপোচহীন মনোভাৱেৰে চলচ্চিত্ৰৰ ভাষাত কথা ক’বলৈ ভাল পোৱা জাহ্নু বৰুৱাক শেহতীয়াভাৱে এখন হিন্দী চলচ্চিত্ৰ পৰিচালনা কৰাৰ অফাৰ দিয়া হৈছে যদিও এই বিষয়ত যেন তেওঁ কিছু নিৰুত্তাপ। তেওঁ স্পষ্টকৈ কৈ দিছে যে তেওঁৰ সৈতে চিনেমা কৰাটো সহজ কথা নহয়।
উল্লেখ্য যে ২০০৫ চনত অসমৰ এইগৰাকী আগশাৰিৰ পৰিচালকে ‘মেইনে গান্ধীকো নেহী মাৰা’ নামৰ এখন চলচ্চিত্ৰ পৰিচালনা কৰিছিল আৰু তাৰ পাছত প্ৰীতি জিণ্টা অভিনীত ‘হৰপল’ পৰচালনা কৰিছিল যদিও তাৰ প্ৰযোজনা বৰ্তমান বন্ধ হৈ আছে।
বৰ্তমান বৰুৱাই প্ৰিয়ংকা চোপ্ৰাক লৈ ‘ভগা খিৰিকি’ নামৰ এখন চলচ্চিত্ৰ পৰিচালনাৰ কাম হাতত লৈছে।
অসম চৰকাৰৰ ‘অসম চলচ্চিত্ৰ পৰ্যটন নীতি’ৰ (আসাম ফিল্ম ট্যুৰিজম পলিচি) অন্তৰ্গত জাহ্নু বৰুৱাৰ শেহতীয়া পৰিচালনাৰ ‘আনৰীড পেজেজ’ নামৰ চলচ্চিত্ৰখন হলীউডৰ এটা স্বাধীন চলচ্চিত্ৰ প্ৰযোজনা কোম্পানি আইভানহো পিকছাৰ্ছ আৰু মুম্বাইৰ ইষ্টাৰ্লি এণ্টাৰ্টেইনমেণ্টে যুটীয়াকৈ প্ৰযোজনা কৰিব।
তেওঁ আৰু হিন্দী চলচ্চিত্ৰ পৰিচালনা কৰিব নেকি বুলি সোধা এটা প্ৰশ্নৰ উত্তৰত প্ৰচণ্ড আত্মবিশ্বাসী পৰিচালকগৰাকীয়ে সেই চিনাকি সৰল হাঁহিৰে কয়, ‘কিছু সংখ্যক অফাৰ আহি আছে, অলপ ভাবি চাওঁ। মোৰ সৈতে কাম কৰাটো বৰ কঠিন’। তেওঁ কয়,‘মোৰ বাবে ছবি নিৰ্মাণ মাথোঁ এটা আমোদ নহয়, ই তাতকৈ আৰু অধিক’।
ইতিমধ্যে ছুটিং সম্পন্ন হোৱা প্ৰিয়ংকা চোপ্ৰা প্ৰযোজনাৰ ‘ভগা খিৰিকি’ চলচ্চিত্ৰখনৰ কাহিনী সামাজিক-ৰাজনৈতিকভাৱে অস্থিৰ পৰিৱেশৰ এজনী কম বয়সীয়া গাৱঁলীয়া মহিলাৰ জীৱনৰ ওপৰত আধাৰিত।
‘প্ৰিয়ংকা চোপ্ৰা’ৰ নামে চলচ্চিত্ৰখনক আৰু বহল ক্ষেত্ৰ এখন দিব নেকি’ বুলি সোধা এটা প্ৰশ্নৰ উত্তৰত পৰিচালক বৰুৱাই কয়, ‘কাৰ সৈতে চলচ্চিত্ৰখন নিৰ্মাণ কৰা হৈছে সেয়া বৰ দাঙৰ কথা নহয়। গুৰুত্বপূৰ্ণ কথাটো হৈছে চলচ্চিত্ৰখনৰ বিষয়বস্তু আৰু কেনেদৰে ইয়াক তুলি ধৰা হৈছে সেয়া গুৰুত্বপূৰ্ণ। কৰাণ প্ৰত্যেকটো সমস্যাৰেই এটা বিশ্বজনীনতা আছে’।
তেওঁ আৰু কয়,‘গতিকে মই ভাবো মোৰ আগৰ চলচ্চিত্ৰবোৰৰ দৰেই এইখনকো সকলো ঠাইতে গ্ৰহণ কৰা হ’ব। তেওঁ বিশ্বাসকৰে যে বিষয়বস্থু সৃষ্টিকৰ্তা (কনটেণ্ট ক্ৰিয়েটৰ), চলচ্চিত্ৰ নিৰ্মাতা, শিল্পীসকল সমাজৰ দায়িত্বশীল নাগৰিক হিচাপে দেশখনৰ সমস্যাৰ পৰা নিজকে আঁতৰাই ৰখা অনুচিত।
