সাম্প্ৰতিক সময়ত বহুতে ঘৰে-অফিচে এচি-ত অভ্যস্ত হৈ পৰিছে। দিনটোৰ ক্লান্তিৰ অন্তত পৰিয়ালটোৱে এচি লগাই শুইছিল। কিন্তু ইয়াৰ পৰিণাম যে এনেকুৱা হ’ব পাৰে কোনেও কল্পনাও কৰিব পৰা নাছিল। নিমিষতে সমগ্ৰ পৰিয়ালটোৰ কৰুণ পৰিণতি। অঞ্চলজুৰি পৰিছে শোকৰ ছাঁ।
জানিব পৰা মতে, এই ঘটনা সংঘটিত হৈছে হাৰিয়ানাৰ ফৰিদাবাদত। নিশা এচি লগাই টোপনি গৈছিল পৰিয়ালটো। প্ৰথম অৱস্থাত গম পোৱা মতে, তেওঁলোকে হঠাতে পুৱতি নিশা ঘৰৰ ভিতৰত ধোঁৱা ওলোৱা দেখিছিল। ঘৰৰ ভিতৰতে শ্বাসৰুদ্ধ হৈ মৃত্যুমুখত পৰে পিতৃ-মাতৃ আৰু কন্যা। পোহনীয়া জন্তুটোৰো মৃত্যু হয়।
বেলকনিৰ পৰা জপিয়াই পুত্ৰই কেনেবাকৈ নিজৰ প্ৰাণ ৰক্ষা কৰে। এই প্ৰসংগত উল্লেখ্য যে তেওঁলোকে শুই থকা কোঠাটোত এচিৰ কোনো সমস্যা নাছিল। অট্টালিকাটোৰ আন এটা মহলাত হৈছিল সমস্যাটো।
সোমবাৰে হাৰিয়ানাৰ ফৰিদাবাদত বহুমহলীয়া অট্টালিকাত এয়াৰ কণ্ডিচনাৰ কম্প্ৰেছাৰ বিস্ফোৰণত একেটা পৰিয়ালৰ তিনিজন সদস্য আৰু তেওঁলোকৰ পোহনীয়া কুকুৰৰ মৃত্যু হয়। জানিব পৰা মতে, নিহত লোক দুজনৰ নাম শচীন কাপুৰ, তেওঁৰ পত্নী ৰিংকু কাপুৰ আৰু তেওঁলোকৰ কন্যা চুজান কাপুৰ।
প্ৰাথমিকভাৱে জানিব পৰা মতে, চাৰি মহলীয়া অট্টালিকাটোৰ প্ৰথম মহলাত নিশা প্ৰায় ১:৩০ বজাত হঠাৎ বিস্ফোৰণ ঘটে আৰু কম সময়ৰ ভিতৰতে দ্বিতীয় মহলালৈ ক’লা ধোঁৱা বিয়পি পৰে। কাপুৰ পৰিয়ালটো তাতেই শুই আছিল।
জানিব পৰা মতে, ঘটনাৰ সময়ত প্ৰথম মহলাৰ ঘৰটো খালী আছিল। শ্বাসৰুদ্ধ হৈ তিনিওজনৰ মৃত্যু হয়। অৱশ্যে সেই মুহূৰ্তত দম্পতীহালৰ পুত্ৰ আন এটা কোঠাত শুই আছিল। কোঠাটোত ধোঁৱা দেখি সি লগে লগে বিল্ডিঙৰ পৰা জপিয়াই দিয়ে।
ঘটনা সন্দৰ্ভত চুবুৰীয়া এজনে জনোৱা মতে, তীব্ৰ বিস্ফোৰণৰ শব্দ শুনি তেওঁলোক সাৰ পায়। কাষৰ বহুমহলীয়া অট্টালিকাটোত জুই লাগিছে। লগে লগে সিহঁত তালৈ লৰালৰিকৈ গ’ল।
মায়ংক নামৰ এজন স্থানীয় ব্যক্তিয়ে সংবাদ মাধ্যমক জনাইছে, ‘বিস্ফোৰণৰ শব্দ শুনাৰ লগে লগে আমি ওলাই আহিলোঁ৷ তাৰ পিছত আমি অট্টালিকাটোৰ আন মানুহবোৰক উদ্ধাৰ কৰিবলৈ লৰালৰি কৰিলোঁ।’ তেওঁ কয় যে চতুৰ্থ মহলাত সাতজনীয়া পৰিয়াল এটা থাকে, আৰু কাপুৰে তৃতীয় মহলাটো নিজৰ কাৰ্যালয় আৰু বিভিন্ন কাৰ্যালয়ৰ কাম-কাজৰ বাবে ব্যৱহাৰ কৰে।
