নেশ্যনেল পিপলছ পাৰ্টী চমুকৈ এনপিপিৰ মৰব্বী তথা মুখ্য মন্ত্ৰী পদৰ প্ৰাৰ্থী কনৰাড ছাংমাই মুখ্য মন্ত্ৰীৰূপে শপত গ্ৰহণ কৰিলে পিছলৈ কোনো সমষ্টিৰ পৰা বিধানসভালৈ মনোনীত হৈ আহিব লাগিব। সেয়ে ছাংমাই মেঘালয়ৰ গাৰো পাহাৰৰ ছংছাক সমষ্টিৰ পৰা প্ৰতিদ্বণ্ডিতা আগবঢ়োৱাৰ সম্ভাৱণাই এতিয়া গা কৰি উঠিছে।
যোৱাটো কাৰ্যকালৰ মুখ্য মন্ত্ৰী মুকুল ছাংমাই বিগত বিধানসভা নিৰ্বাচনত ছংছাক আৰু আমপাটী এই দুটা সমষ্টিৰ পৰা প্ৰতিদ্বণ্ডিতা কৰি জয়লাভ কৰিছিল। সেয়ে মকুল ছাংমাই ইয়াৰে যিকোনো এটা সমষ্টিৰ পৰা পদত্যাগ কৰিব লাগিব আৰু পদত্যাগ কৰা সমষ্টিটোত উপ নিৰ্বাচন অনুষ্ঠিত হ’ব। এক শুত্ৰই প্ৰকাশ কৰা অনুসৰি ছাংমাই ছংছাক বিধানসভা সমষ্টিৰ পদটো ত্যাগ কৰিব।
উল্লেখ্য যে ৪০ বছৰীয়া কনৰাড বৰ্তমান টুৰা লোকসভা সমষ্টিৰ সাংসদ ৰূপে কাৰ্যনিৰ্বাহ কৰি আছে আৰু তেওঁ ২০১৮ মেঘালয় বিধানসভা নিৰ্বাচনত প্ৰতিদ্বণ্ডিতা আগবঢ়োৱা নাছিল।
ইফালে দেওবাৰে সন্ধিয়া ৰাজ্যখনৰ ৰাজ্যপাল গংগা প্ৰসাদক সাক্ষাত কৰি ৩৪ জন বিধায়কৰ সমৰ্থনৰে এনপিপিৰ নেতৃত্বত চৰকাৰ গঠন কৰাৰ দাবী তোলে এনপিপিৰ নেতা কনৰাড ছাংমাই। ৰাজ্যখনত বুধবাৰে নতুন চৰকাৰে শপত গ্ৰহণ কৰিব।
মেঘালয় বিধানসভা নিৰ্বাচনৰ ফলাফল অনুসৰি কংগ্ৰেছে ২১ খন আসন লাভ কৰিছে আৰু ইয়াৰ বিপৰীতে এনপিপিয়ে লাভ কৰিছে ১৯ খন আসন।
আনহাতে ইয়াৰ পূৰ্বৰ নিৰ্বাচনত এখনো আসন নোপোৱা বিজেপিয়ে এইবাৰৰ নিৰ্বাচনত দুখন আসন লাভ কৰিবলৈ সক্ষম হয়। তদুপৰি ইউডিপিয়ে ৬ খন আসন আৰু ইয়াৰ মিত্ৰজোঁটৰ দল এইচএছপিডিপিয়ে দুখন আসন দখল কৰে।
পিপলছ ডেম’ক্ৰেটিক ফ্ৰণ্ট চমুকৈ পিডিএফে ৪ খন আসন, নেশ্যনেলিষ্ট কংগ্ৰেছ পাৰ্টী আৰু কেএইচএনএএম দলে একোখনকৈ আসন লাভ কৰাৰ লগতে অন্য তিনিজন নিৰ্দলীয় প্ৰাৰ্থীয়েও নিৰ্বাচনত জয়যুক্ত হয়।
উল্লেখণীয় যে যোৱা শণিবাৰে মেঘালয়ৰ নিৰ্বাচনৰ ফলাফল ঘোষণা কৰাৰ পিছতেই বিজেপিয়ে এখন অকংগ্ৰেছী চৰকাৰ গঠন কৰাৰ স্বাৰ্থত এনপিপি আৰু ইউডিপিক মিত্ৰতা কৰিবলৈ প্ৰস্থাব আগবঢ়াই।
