থাইলেণ্ডত সদ্য সমাপ্ত ষ্টুডেন্টছ অলিম্পিক এছিয়ান গেইমছত পাকিস্তানক পৰাস্ত কৰি চেম্পিয়নৰ খিতাপ অৰ্জন কৰা ত্ৰিপুৰাৰ টিটিএএডিচি ফুটবল দলটোক সোমবাৰে ত্ৰিপুৰা ৰাজ্য চৰকাৰে সম্বৰ্ধনা জ্ঞাপন কৰে।
ভগত সিং য়ুথ হোষ্টেলত আয়োজিত সম্বৰ্ধনা অনুষ্ঠানত ৰাজ্যখনৰ মুখ্য মন্ত্ৰী বিপ্লব কুমাৰ দেবে ক্ৰীড়া বিভাগৰ বিভিন্ন বিষয়া, খেলুৱৈ, প্ৰশিক্ষকৰ উপস্থিতিত ১৭ অনূৰ্ধ্ব বিজয়ী দলটোৰ খেলুৱৈসকলক ১ লাখ টকাৰ চেক প্ৰদান কৰে।
মুখ্য মন্ত্ৰী দেবে বিজয়ী দলটোৰ সকলো সদস্যকে শুভেচ্ছা প্ৰদান কৰাৰ লগতে খেলুৱৈসকলক ভৱিষ্যতে তেওঁলোকৰ প্ৰদৰ্শন উন্নত কৰাৰ ক্ষেত্ৰত ৰাজ্য চৰকাৰৰ তৰফৰ পৰা সকলো ধৰণৰ সা-সুবিধা প্ৰদান কৰিব বুলিও আশ্বাস দিয়ে।
উক্ত সম্বৰ্ধনা অনুষ্ঠানতে তেওঁ কয় যে যোৱা ২৫ বছৰত ৰাজ্যখনৰ অধিকাংশ যুৱ প্ৰজন্ম ড্ৰাগছ আৰু নিচাজাতীয় সামগ্ৰী সেৱনৰ বাবে ধ্বংস হৈ গৈছে। কিন্তু খেলে নিচাজাতীয় সামগ্ৰী সেৱন কৰাৰ ক্ষেত্ৰত প্ৰতিষেধক হিচাপে কাম কৰে।
উল্লেখ্য যে খেলুৱৈসকলে নিজ দেশ তথা ৰাজ্যৰ বাবে কঢ়িয়াই অনা সাফল্যৰ বাবে ৰাজ্য চৰকাৰে শুভেচ্ছা প্ৰদান কৰাত তেওঁলোকো যথেষ্ট সুখী বুলি মন্তব্য কৰা পৰিলক্ষিত হয়।
