বিশ্বৰ ভিতৰতেই সাংস্কৃতিক ক্ষেত্ৰত ৰাভাসকল অতি চহকী। এই মন্তব্য ৰাভা হাছং স্বায়ত্তশাসিত পৰিষদৰ অধ্যক্ষ তৰুণ চন্দ্ৰ ৰাভাই নিখিল ৰাভা সাহিত্য সভাৰ প্ৰতিষ্ঠা দিৱসত উপস্থিত থাকি কয়।
কামৰূপ জিলাৰ অসম-মেঘালয় সীমান্তৱৰ্তী ৰাভা হাছং এলেকাৰ অন্তৰ্গত বৰদুৱাৰ বাগানৰ নিকটৱৰ্তী সৰুৰাণীত আয়োজিত প্ৰতিষ্ঠা দিৱসত তেওঁ আৰু কয় যে জাতীয় সাজপাৰেৰে বৰ্ণিল স্বকীয়তাৰ উত্তৰণৰ বিপৰীতে ভাষাৰ ক্ষেত্ৰত জাতিটো পিছপৰি আছে। লগতে এই ক্ষেত্ৰত ভাষা আনদোলনৰ প্ৰয়োজনীয়তাৰ কথাও উল্লেখ কৰে তৰুণ চন্দ্ৰ ৰাভাই।
উল্লেখ্য যে সৰুৰাণী বিষ্ণুজ্যোতি সংঘৰ উদ্যোগত দেওবাৰে এদিনীয়া কাৰ্যসূচীৰে আয়োজিত প্ৰতিষ্ঠা দিৱসৰ কাৰ্যসূচী পতাকা উত্তোলনেৰে আৰম্ভ হয়। ইফালে স্মৃতি তৰ্পণ, বৃক্ষৰোপণ কাৰ্যসূচীৰ উপৰি এটি বাৰেৰহনীয়া সাংস্কৃতিক সমদলৰ শুভাৰম্ভণি কৰে আঞ্চলিক ষষ্ঠ অনুসূচি দাবী সমিতিৰ সভাপতি বিচিত্ৰ ৰাভাই।
আনহাতে লোক সংস্কৃতিৰ বিশিষ্ট গৱেষক ভুবিন ৰাভাৰ সঞ্চালনাত অনুষ্ঠিত ৰাভা জাতি গঠন প্ৰক্ৰিয়াত ভাষা আৰু সাজপাৰৰ গুৰুত্ব শীৰ্ষক আলোচনা চক্ৰত কেন্দ্ৰীয় ষষ্ঠ অনুসূচী দাবী সমিতিৰ মুখ্য সম্পাদক নৃপেন ৰাভা, চিন্তাবিদ গোলাপ ভৰালী, নিখিল ৰাভা জাতীয় পৰিষদৰ সম্পাদক গোবিন্দ ৰাভা, ছাত্ৰ নেতা দেৱজিৎ নাফাৰ লগতে বহুতো বিশিষ্ট লোক উপস্থিত থাকে।
মনকৰিবলগীয়া যে বিভিন্ন সাংস্কৃতিক অনুষ্ঠানৰ মাজেৰে সফল সমাপ্তি ঘটা সাহিত্য সভাৰ প্ৰতিষ্ঠা দিৱসৰ লগত সংগতি ৰাখি সাংস্কৃতিক কৰ্মী শুক্ৰ চিনালে ‘মেহেঙাদাব’ শীৰ্ষক এখন মুখপত্ৰ উন্মোচন কৰে।
