অৰুণাচল প্ৰদেশৰ উপ মুখ্য মন্ত্ৰী চাওনা মিয়ে ৪১৫ নং ৰাষ্ট্ৰীয় ঘাইপথৰ চন্দ্ৰনগৰৰ পৰা বান্দৰদোৱা পথ ছোৱাৰ ৪ লেন যুক্ত কাম ২০১৯ চনৰ মাৰ্চৰ ভিতৰত সম্পূৰ্ণ কৰাৰ বাবে এক সময়সীমা নিৰ্ধাৰণ কৰিছে।
উপ মুখ্য মন্ত্ৰীজনে বৃহস্পতিবাৰে ৰাজ্যখনৰ কেইটামান বিভাগৰ বিষয়াৰ লগত এক আলোচনাত মিলিত হৈ এই সিদ্ধান্ত গ্ৰহণ কৰে। আলোচনাত উপস্থিত থাকে ৰিতেন কুমাৰ সিঙ, বিলাটী পাৰ্টিন, টলি বাছৰ, প্ৰিন্স ধাৱানৰ লগতে বহুতো বিষয়া কৰ্মচাৰী।
৪ লেন যুক্ত ৰাষ্ট্ৰীয় ঘাইপথৰ কাম কাজ লেহেমীয়া গতিত আগবঢ়া বাবে উপ মুখ্য মন্ত্ৰী মিয়ে অসন্তুষ্টি প্ৰকাশ কৰে। লগতে মিয়ে ৰাষ্ট্ৰীয় ঘাইপথৰ কামত নিয়োজিত ঠিকাদাৰ সকলক কামত ব্যৱহৃত যন্ত্ৰৰ সংখ্যা আৰু কাম কৰা সময় বৃদ্ধি কৰিবলৈ নিৰ্দেশ দিয়ে।
ইয়াৰ উপৰি তেওঁ নিশাও কাম কৰাৰ বাবে নিৰ্দেশ দিয়ে, বিশেষকৈ চন্দ্ৰপুৰৰ পৰা ৰাজভৱন অঞ্চলচোৱা।
আনহাতে মিয়ে বাৰিষাৰ আগতে সচিৱালয়ৰ ফালে স্থায়ী বেৰ নিৰ্মান কৰিবলৈ নিৰ্দেশ দিয়ে। লগতে ভূমিস্খলনৰ ফলত যাতে ইটানগৰৰ টাউনশ্বীপৰ কোনো বিশেষ ক্ষয় ক্ষতি নহয় তাৰ প্ৰতিও লক্ষ্য ৰাখিবলৈ নিৰ্দেশ দিয়ে।
ঘাইপথৰ সংসদীয় সচিৱ টেছি কাছোৱে ৰাষ্ট্ৰীয় ঘাইপথ নিৰ্মানত সহায়ক হোৱাৰ বাবে পানীৰ পাইপ লাইন, বিদ্যুতৰ খুটা, টেলিফোন খুটা, আৰু ওএফচি কেবল তাঁৰ সমূহ ঘাইপথৰ সমীপৰ পৰা স্থানান্তৰ কৰি অন্য ঠাইত সংস্থাপন কৰিবলৈ নিৰ্দেশ জনায়। তদুপৰি কোনো বিষয়াই যদি কামত গাফিলতি কৰে তেন্তে সেই বিষয়াৰ ওপৰত কঠোৰ ব্যৱস্থা গ্ৰহণৰো নিৰ্দেশ দিয়ে।
