নিৰুদ্দিষ্ট হৈ থকা পি চি জিৰ সদস্য ৰেৱতী ফুকনৰ সন্ধান সন্দৰ্ভত আজি উচ্চতম ন্যায়ালৰ দুজনীয়া বিচাৰপীঠত আজি শুনানি অনুষ্ঠিত হয়। এই শুনানিৰ সময়ত অসম চৰকাৰৰ প্ৰতিনিধিয়ে বিষয়টো সন্দৰ্ভত SIT ৰ প্ৰতিবেদন বন্ধ খামত জমা দিয়া বুলি জানিব পৰা গৈছে।
আনহাতে আই বি আৰু নিয়াই (NIA) তেওঁলোকৰ জিম্মাত ৰেৱতী ফুকন নাই বুলি জানিবলৈ দিয়ে আদালতক। আই বি আৰু নিয়াই গৃহ মন্ত্ৰ্যালয়ৰ যোগেদি শপতনামা দাখিল কৰে বুলি সূত্ৰটোৱে কয়। একেখন বিচাৰপীঠতে পুনৰ কাইলৈ ৰেৱতী ফুকনৰ নিৰুদ্দেশৰ গোচৰটোৰ শুনানি আছে।
উল্লেখযোগ্য যে যোৱা ২২ এপ্ৰিলৰ পুৱাৰে পৰা নিৰুদ্দেশ হৈ আছে আলফা-চৰকাৰৰ প্ৰথমলানি আলোচনাৰ বাবে গঠিত পি চি জিৰ অন্যতম সদস্য ৰেৱতী ফুকন।
দীৰ্ঘদিন ধৰি অসম আৰক্ষীয়ে ফুকনৰ কোনো সন্ধান উলিয়াব নোৱৰাৰ পিছত ফুকনৰ পুতেক কৌশিক ফুকনে উচ্চতম ন্যায়ালয়ত দেউতাকৰ নিৰুদ্দেশৰ বিষয়টোত হস্তক্ষেপ বিচাৰি আৱেদন জনাইছিল।
তাৰ পিছতে ১৪ দিনৰ ভিতৰত প্ৰতিবেদন দাখিল কৰিবলৈ উচ্চতম ন্যায়ালয়ে কেন্দ্ৰীয় আৰু ৰাজ্য চৰকাৰক দিয়া সময়সীমা দিয়ে। উক্ত সময়সীমাৰ অন্ত পৰাৰ পিছতে চৰকাৰে অধিক সময় বিচাৰিছিল আদালতৰ পৰা।
উচ্চতম ন্যায়ালয়ত এল নাগেশ্বৰ ৰাওৰ নেতৃত্বত গঠিত উচ্চতম ন্যায়ালয়ৰ দুজনীয়া বিচাৰপীঠ এখনে গোচৰটোৰ তদাৰক কৰি আছে।
