শেহতীয়াভাৱে লণ্ডনত অনুষ্ঠিত ইউনিক’ডৰ এখন বৈঠকত অসমীয়া ভাষাই স্বতন্ত্র ভাষাৰ স্বীকৃতি লাভ নকৰাৰ পাছত বাংলা ভাষাৰ সৈতে সংলগ্ন হৈ থকাৰ সিদ্ধান্ত গ্রহণ কৰা বাবে অসম সাহিত্য সভাৰ নেতৃবর্গক এই চুক্তি বাতিল কৰিবলৈ সকীয়নি দিছে আলফাই (স্বাধীন)৷
আলফাই (স্বাধীন) প্রতিনিধি দলটোক ইউনিক’ডৰ সৈতে কৰা চুক্তি অতি শীঘ্রে বাতিল কৰি পুনৰ আলোচনা কৰাৰ পদক্ষেপ লোৱাৰ বাবে দাবী উত্থাপন কৰে৷ আনহাতে ইউনিক’ডৰ সৈতে পুনৰ কৰিবলগীয়া আলোচনাৰ বাবে যোগ্য ব্যক্তিক লৈ নতুনকৈ সমিতি গঠন কৰিবলৈ আহবান জনাই অসমীয়া ভাষাক লৈ দীর্ঘদিন কাম কৰি থকা দুজন ব্যক্তিক কর্ণধাৰত ল’বৰ বাবেও আলফাই আহ্বান জনাইছে।
শনিবাৰে এক বিবৃতিযোগে সংগঠনটোৱে ড০ শিখৰ শর্মাৰ নেতৃত্বত যোৱা প্রতিনিধি দলটোৱে অসমীয়া লিপিক বাঙালী লিপিৰ উপলিপি হিচাপে ইউনিক’ডে দিয়া স্বীকৃতি মানি লোৱা কার্যত আশ্চর্য প্রকাশ কৰি কয়— ‘অসমীয়া ভাষাৰ পৰাহে বাঙালী ভাষাৰ উৎপত্তি হৈছিল বুলি প্রফুল্ল চন্দ্র ৰায়ৰ দৰে ব্যক্তিয়ে পূর্বেই লিখি থৈ গৈছিল৷ ড০ সত্যকাম ফুকনে আৰাকানত উদ্ধাৰ কৰা অতি প্রাচীন শিলালিপিৰ দৰে লিপি বাংলাদেশৰ বৰেন্দ্র পুৰাতত্ত্ব সংগ্রহালয়তো আছে৷ ওড়িষাৰ ভাষাতত্ত্ববিদ দেৱীপ্রসন্ন পাটনায়কে ডিব্রুগড় সাহিত্য সভাৰ ভাষণত অসমীয়া ভাষা যে বাঙালী ভাষাতকৈ পুৰণি সেয়া বৈজ্ঞানিক বিশ্লেষণেৰে ভাষা বিজ্ঞানৰ শৈলীৰে দেখুৱাই থৈছে বুলিও আলফাই (স্বাধীনে) প্রকাশ কৰে৷
আনহাতে লণ্ডনৰ ব্রিটিছ সংগ্রহালয়তো অসমীয়া ভাষাৰ প্রাচীনত্বৰ প্রমাণ আছে বুলি দাবী কৰে আলফাই৷ প্রতিনিধি দলটোৱে সেই সংগ্রহালয়ত প্রমাণৰ সন্ধান কৰিছিলনে বুলিও সংগঠনটোৱে প্রশ্ন উত্থাপন কৰে৷
ইউনিক’ডৰ সৈতে প্রতিনিধি দলটোৱে কৰা চুক্তি শীঘ্রে বাতিল কৰি পুনৰ নতুন সমিতি গঠন কৰি আলোচনাৰ ব্যৱস্থা কৰিবলৈ কয় আৰু আলফাই নতুন সমিতিত ড০ সত্যকাম ফুকনক কর্ণধাৰ আসনত বহুৱাবলৈ আহবান জনায়৷
তদুপৰি আমেৰিকাত অসমীয়া ভাষাক ডিজিটেল কৰাৰ ক্ষেত্রত কাম কৰি থকা ৰবীন ডেকাকো সমিতিত সামৰি ল’বলৈ আলফাই আহবান জনায়৷ আলফাই (স্বাধীন) জনোৱা আহ্বানৰ প্ৰতি জাতীয় সংগঠনসমূহে কেনে সঁহাৰি দিয়ে সেয়া পৰৱৰ্তী সময়ত লক্ষণীয় হ’ব।
