‘অসমৰ মাটিত কোনো উপগ্ৰহীয় পৰিষদ বা বিশেষ উন্নয়ন কৰ্তৃপক্ষ গঠনৰ অনুমতি দিয়া নহ’ব। অসমৰ এক ইঞ্চি ভূমিও ত্যাগ কৰা নহ’ব।’ ডিমা হাচাওৰ নাগালিমত অন্তৰ্ভুক্তিক লৈ সমগ্ৰ ৰাজ্যজুৰি উৎকণ্ঠা অব্যাহত থকাৰ মাজতে আজি এই ঘোষণা কৰে মুখ্য মন্ত্ৰী সৰ্বানন্দ সোণোৱালে।
ডিমা হাচাওৰ বৰ্তমান পৰিস্থিতি সম্পৰ্কে আলোচনা কৰা বাবে উত্তৰ কাছাৰ পাৰ্বত্য পৰিষদৰ মুখ্য কাৰ্য্যবাহী দেবলাল গাৰ্লচা আৰু বিভিন্ন ডিমাচা সংগঠনৰ নেতৃবৃন্দৰ সৈতে হোৱা বৈঠকত আজি এই ঘোষণা কৰে মুখ্য মন্ত্ৰীগৰাকীয়ে।
বিষয়টোক লৈ জিলাখনৰ বাসিন্দাসকলৰ সকলো আশংকা দূৰ কৰাৰ বাবে অসম চৰকাৰে পৰিষদক আজি এখন নিশ্চিতি পত্ৰ (assurance letter) প্ৰদান কৰে বুলি এন ই নাওলৈ প্ৰেৰণ কৰা মুখ্য মন্ত্ৰীৰ এক বিবৃতিত কোৱা হৈছে।
‘অসমৰ মানচিত্ৰ সলনিৰ অনুমতি দিয়া নহ’ব’ বুলি ঘোষণা কৰি মুখ্য মন্ত্ৰীয়ে জনাই যে যোৱা ৰাতি গৃ্হ মন্ত্ৰী ৰাজনাথ সিঙৰ সৈতে হোৱা টেলিফ’নযোগে হোৱা বাৰ্তালাপত কেন্দ্ৰীয় গৃ্হ মন্ত্ৰীগৰাকীয়ে অসমৰ ভৌগোলিক অখণ্ডতাৰ ক্ষতি কৰা নহ’ব বুলি নিশ্চিতি দিছে।
মুখ্য মন্ত্ৰীগৰাকীয়ে সকলো ৰাইজকে শান্তি-সম্প্ৰীতি বৰ্তাই ৰাখিবলৈ আহ্বান জনাইছে।
বিবৃতিটোত লগতে কোৱা হৈছে যে মুখ্য মন্ত্ৰী শীঘ্ৰে ডিমা হাচাওলৈ যাব আৰু অঞ্চলটোৰ গাওঁবুঢ়াসকলৰ লগত আলোচনাত মিলিত হ’ব।
