৩৪ নং অসম ৰাইফলচৰ সেনাপতি বিগ্ৰেডৰ উদ্যোগত বৃহস্পতিবাৰে মণিপুৰৰ টাফ নাগা গাঁৱত এখন প্ৰাক বৰদিন মেলাৰ আয়েজন কৰে। অঞ্চলটোত এই ধৰণৰ এইখনেই প্ৰথম মেলা। সেনাপতি বিগ্ৰেডৰ এজন বিষয়াই জানিবলৈ দিয়া অনুসৰি স্থানীয় লোক সকলক প্ৰাক বৰদিন উদযাপন আৰু এই উপলক্ষে মনেৰঞ্জন দিয়াৰ উদ্দেশ্যে উক্ত মেলাৰ আয়োজন কৰা হৈছে। সেনাপতি বিগ্ৰেডৰ কমাণ্ডাৰ বিগ্ৰেডিয়াৰ দিপাংকৰ শ্বাহাই মুখ্য অতিথি হিচাপে অংশ গ্ৰহণ কৰা অনুষ্ঠানটোত ৫৭ নং মাউণ্টেইন ডিভিজনৰ অতিৰিক্ত জেনেৰেল অফিচাৰ কামাণ্ডিক ইনচিফ (GOC) এছ কে এছ চৌহান উপস্থিত থাকে। আকাশলৈ বেলুন উৰুৱাই আনুষ্ঠানিকভাৱে মেলাখন উদ্বোধন কৰি কামাণ্ডাৰ দিপাংকৰ শ্বাহাই বৰদিনৰ বতৰত সকলোকে শান্তি আৰু সম্প্ৰীতিৰ উদ্দেশ্যে আহ্বান জনায়। মেলাখনত সেনা তথা সাধাৰণ লোকসকলে মিলি খাদ্য তথা খেলা-ধুলা আদিৰ বিভিন্ন ষ্টল বহুৱাই। ইয়াৰ উপৰি অনুষ্ঠানটোত ৩৮ নং অসম ৰাইফলচৰ দ্বাৰা পাইপ বেণ্ড প্ৰদৰ্শন, টাফ নাগাৰ দ্বাৰা পৰম্পৰাগত নগা নৃত্য, ১৪ নং শিখ ৰেজিমেণ্টৰ দ্বাৰা ভাংৰা আদি বিভিন্ন সাংস্কৃতিক অনুষ্ঠান পৰিৱেশন কৰা হয়।
