আজি অৰুণাচলৰ মুখ্য মন্ত্ৰী পেমা খাণ্ডুৱে অসম-অৰুণাচলৰ সীমান্তৱৰ্তী অঞ্চল জয়ৰামপুৰত থকা আৰু ১৯৫৩ চনতে প্ৰতিষ্ঠা কৰা এখন চৰকাৰী উচ্চতৰ মাধ্যমিক বিদ্যালয়ৰ নৱ নিৰ্মিত ভৱন উদ্বোধন কৰে।
উদ্বোধনী অনুষ্ঠানটোত ৰাজ্যখনৰ শিক্ষা মন্ত্ৰী হনচুন গানডাম, অৰুণাচলৰ ৰাজ্যিক বিজেপিৰ সভাপতি টাপিৰ গাও, সংসদীয় সচিব (লিগেল মেট্ৰ’ল’জি ) লাইচাম চিমাই, সংসদীয় সচিব (DoTCL) টেচাম পংটে, কানুবাৰী সমষ্টিৰ বিধায়ত গেব্ৰিয়েল ৱাংচু আৰু ডি আই জি পি (ই) অপুৰ বিটিনো উপস্থিত আছিল।
অনুষ্ঠানটো উপস্থিত ছাত্ৰ-ছাত্ৰীক পৰামৰ্শ দি মুখ্য মন্ত্ৰীজনে তেওঁলোকক ভৱিষ্যতৰ প্ৰতিযোগিতাৰ প্ৰতি সাজু হ’বলৈ কয়। ভুল শক্তিয়ে যাতে তেওঁলোকৰ কেৰিয়াৰক বিপথে লৈ যাব নোৱাৰে তাৰ বাবে সতৰ্ক দৃষ্টি দিবলৈ কয়।
আনহাতে বিদ্যালয়খনৰ অধ্যক্ষই দিয়া এখন স্মাৰকপত্ৰ সন্দৰ্ভত মুখ্য মন্ত্ৰীজনে কয় যে বিদ্যালয়খনত থকা আন্তঃগাঁথনিৰ সকলো ধৰণৰ অভাৱ দূৰ কৰা হ’ব। ৰাজ্যখনৰ সকলো বিদ্যালয়ৰে আন্তঃগাঁথনি উন্নত কৰা হ’ব বুলিও তেওঁ প্ৰতিশ্ৰুতি দিয়ে।
পেমা খাণ্ডুৱে ৰাজ্যখনৰ জনসাধাৰণ, পঞ্চায়ত কৰ্মী, ছাত্ৰ-ছাত্ৰী সকলোকে শিক্ষকৰ প্ৰতি সন্মান প্ৰদৰ্শন কৰিবলৈ আহ্বান জনায়। তেওঁলোকে সমাজলৈ দিয়া অৱদানৰ স্বীকৃতি পোৱা উচিত বুলি তেওঁ মন্তব্য কৰে।
আজি মুখ্য মন্ত্ৰীজনে ইয়াৰ টেৰি নগৰত এটা স্প’ৰ্টছ কমপ্লেক্স তথা বহুমুখী উদ্দেশ্যৰ হলঘৰো উদ্বোধন কৰে।
