যি সময়ত অসম চৰকাৰৰ ‘আপোন ঘৰ’ আঁচনিৰ দ্বাৰা ৰাজ্যখনৰ হাজাৰ হাজাৰ চৰকাৰী কৰ্মচাৰীয়ে নিজাকৈ এটা ঘৰ সজাৰ সপোন দেখিছে তেনে সময়তে ওদালগুৰি জিলাৰ এগৰাকী হিতাধিকাৰীয়ে উত্থাপন কৰিছে এক গুৰুতৰ অভিযোগ।
ওদালগুৰি জিলাৰ লাইলুংপাৰা উচ্চ মাধ্যমিক বিদ্যালয়ৰ সহকাৰী শিক্ষয়ত্ৰী কিমি নাৰ্জাৰীয়ে এক প্ৰেছ বিবৃতিযোগে উত্থাপন কৰা অভিযোগ অনুসৰি অসম চৰকাৰে ‘আপোন ঘৰ’ আঁচনিৰ বাবে বান্ধি দিয়া নীতি নিয়মৰ মাজেৰে তেওঁ ভাৰতীয় ষ্টেট বেংকৰ ৰৌতা চাৰিআলি শাখাত আবদেন দাখিল কৰিছিল ২০১৭ চনৰ ছেপ্টেম্বৰ মাহৰ দ্বিতীয় সপ্তাহত।
কিন্তু অতি আশ্বৰ্যজনকভাৱে সকলো নীতি নিয়ম সম্পূৰ্ণ কৰি যাৱতীয়া প্ৰক্ৰিয়াৰ মাজেৰে আবেদন কৰা সত্ত্বেও বিগত পাঁচ মাহ ধৰি ‘আপোন ঘৰ’ আঁচনিৰ পাবলগীয়া ধন লাভৰ পৰা বঞ্চিত হৈছে বুলি অভিযোগ উত্থাপন কৰিছে নাৰ্জাৰীয়ে।
বিগত পাঁচমাহ ধৰি নাৰ্জাৰীয়ে ভাৰতীয় ষ্টেট বেংকৰ ৰৌতা চাৰিআলি শাখাটোলৈ তাঁতবাতি কাঢ়ি আছে যদিও বেংক কৰ্তৃপক্ষই এই ক্ষেত্ৰত তেওঁক কোনো উপযুক্ত কাৰণ বাখ্যা কৰিবলৈ সক্ষম হোৱা নাই।
সেয়েহে ভুক্তভোগী মহিলাগৰাকীয়ে এই ক্ষেত্ৰত সংশ্লিষ্ট কৰ্তৃপক্ষক উচিত ব্যৱস্থা গ্ৰহণৰ আহ্বান জনাইছে। বিষয়টোৱে সমগ্ৰ জিলাখনতে সৃষ্টি কৰিছে তীব্ৰ প্ৰতিক্ৰিয়া।
