এষ্ট্ৰাজেনেকাৰ কোভিড ভেকচিনৰ পাৰ্শ্বক্ৰিয়া থকাৰ দাবী তুলি ব্ৰিটেইনৰ আদালতত প্ৰথমে গোচৰ তৰা হৈছিল। এতিয়ালৈকে এই বিষয়ত সন্দেহ দূৰ কৰা নাই ভেকচিন নিৰ্মাণ কোম্পানীটোৱে। কিন্তু শেহতীয়াকৈ তেওঁলোকে স্বীকাৰ কৰিছে যে তেওঁলোকৰ ভেকচিন গ্ৰহণ কৰিলে বিৰল পাৰ্শ্বক্ৰিয়া হ’ব পাৰে।
ভাৰতত কোভিশ্বিল্ড নামেৰে এষ্ট্ৰাজেনেকাৰ ভেকচিনটোৰ ইয়াৰ ভেকচিন ড’জে বিৰল ৰোগ সৃষ্টি কৰাৰ সম্ভাৱনা আছে। এই খবৰ পোহৰলৈ অহাৰ লগে লগে সমগ্ৰ দেশতে প্ৰতিক্ৰিয়াৰ সৃষ্টি হয়। কাৰণ ভাৰতৰ বেছিভাগ মানুহেই এই ভেকচিন গ্ৰহণ কৰিছিল। এনে পৰিস্থিতিত এইবাৰ উচ্চতম ন্যায়ালয়তো ৰুজু কৰা হৈছে গোচৰ। উচ্চতম ন্যায়ালয়ক কোভিশ্বিল্ডৰ পাৰ্শ্বক্ৰিয়াৰ বিষয়টো চালিজাৰি চোৱাৰ বাবে অবেদন জনোৱা হৈছে।
বিশাল তিৱাৰী নামৰ এজন অধিবক্তাই এই সন্দৰ্ভত উচ্চতম ন্যায়ালয়ত গোচৰ ৰুজু কৰে। তেওঁ কোভিশ্বিল্ড ভেকচিনৰ পাৰ্শ্বক্ৰিয়াৰ লগত জড়িত বিপদৰ মূল্যায়নৰ বাবে চিকিৎসকৰ বিশেষজ্ঞ পেনেল গঠন কৰিবলৈ দাবী জনায়।
লগতে পঢ়কঃ কোভিড ভেকচিনৰ প্ৰমাণ পত্ৰৰ পৰা আঁতৰিল প্ৰধানমন্ত্ৰী মোডীৰ ফটো; কিয় দিয়া হ’ল আঁতৰাই?
একে সময়তে এই ভেকচিন গ্ৰহণ কৰাৰ পিছত অসুস্থ বা মৃত্যু হোৱা লোকসকলৰ পৰিয়াললৈ প্ৰত্যক্ষ ক্ষতিপূৰণ দিবলৈও অনুৰোধ জনোৱা হৈছে। উল্লেখ্য যে এই কোভিশ্বিল্ড ভেকচিন ভাৰতত ছেৰাম ইনষ্টিটিউট অফ ইণ্ডিয়া বা এছআইআই-ৰ দ্বাৰা প্ৰস্তুত কৰা হৈছিল।
ধাৰাবাহিক অভিযোগ আৰু গোচৰৰ অন্তত এষ্ট্ৰাজেনেকাই স্বীকাৰ কৰে যে ভেকচিন লোৱা লোকসকলৰ থ্ৰম্ব’ছিছ বা তেজ জমা হোৱাৰ লক্ষণ দেখা দিব পাৰে। পূৰ্বে ভেকচিন লোৱাৰ পিছত দেখা দিয়া লক্ষণসমূহক চিকিৎসা বিজ্ঞানৰ ভাষাত পৰা থ্ৰম্ব’চাইট’পেনিয়া চিনড্ৰম (TTS) বুলি জনা যায়। আনকি তেজত থকা প্লেটলেট বা অনুচক্ৰিকা কমি যোৱা দেখা গৈছে।
কোভিশ্বিল্ডৰ পাৰ্শ্বক্ৰিয়া স্বীকাৰ কৰাৰ লগতে এষ্ট্ৰাজেনেকাই লগতে কয় যে ৰোগীৰ সুৰক্ষা তেওঁলোকৰ শীৰ্ষ অগ্ৰাধিকাৰ। তেওঁলোকে সকলো ঔষধ আৰু ভেকচিনৰ সুৰক্ষা স্পষ্টভাৱে নিশ্চিত কৰে। তদুপৰি যিসকলে নিজৰ আপোনজনক হেৰুৱাইছে বা টিকাকৰণৰ পিছত শাৰীৰিক সমস্যাত ভুগিছে তেওঁলোকৰ প্ৰতি সমবেদনা প্ৰকাশ কৰে।
লগতে পঢ়কঃ মৰ্মান্তিক! বেঁকী নদীত গা ধুবলৈ গৈ বৰপেটা ৰোডৰ তিনি যুৱকৰ কৰুণ মৃত্যু
এষ্ট্ৰাজেনেকাই কোৱা নাই যে তেওঁলোকৰ ভেকচিন একেবাৰেই নিৰাপদ নহয়। তেওঁলোকে এক বিবৃতিত কয়, “বিৰল ৰোগৰ আশংকা কম। অতি কম সংখ্যক লোকৰহে এই ৰোগৰ লক্ষণ দেখা দিছিল। এইটো অতি বিৰল ঘটনা। ভেকচিনত কোনো ধৰণৰ খুঁত নাই। ভেকচিন সকলোৰে বাবে নিৰাপদ আৰু সুৰক্ষিত।”
