নাগালেণ্ডৰ আসন্ন নিৰ্বাচনৰ প্ৰতি লক্ষ্য ৰাখি শুকুৰবাৰে নিৰ্বাচন আয়োগে ১৬৪৩ কিলোমিটাৰ জোৰা ভাৰত-ম্যানমাৰ সীমান্তত তীক্ষ্ন নজৰ ৰাখিবলৈ অসম ৰাইফলছক নিৰ্দেশ দিছে।
চুবুৰীয়া ৰাষ্ট্ৰ ম্যানমাৰৰ আন্তৰ্জাতিক সীমান্তৰ আশে পাশে শিৱিৰ পাতি থকা উত্তৰ-পূবৰ বিদ্ৰোহী সংগঠনসমূহে চলাব পৰা সম্ভাৱ্য কূটাঘাত প্ৰতিৰোধ কৰাৰ বাবে এই ব্যৱস্থা গ্ৰহণৰ পদক্ষেপ লোৱা হৈছে।
নিৰ্বাচন আয়োগে মত পোষণ কৰে যে বিদ্ৰোহীসকলে আগন্তুক নিৰ্বাচনৰ সময়ত হিংসাত্মক ঘটনাৰ সৃষ্টি কৰি আইন শৃংখলাজনিত সমস্যাৰ সৃষ্টি কৰিবলৈ ম্যানমাৰৰ পৰা ৰাজ্যখনত প্ৰৱেশ কৰাৰ চেষ্টা চলাব।
ফেব্ৰুৱাৰী বা মাৰ্চত মেঘালয় আৰু ত্ৰিপুৰাৰ লগতে নাগালেণ্ডতো নিৰ্বাচন অনুষ্ঠিত হ’ব।
ইয়াৰ মাজতে নাগালেণ্ডৰ মুখ্য নিৰ্বাচনী আয়ুক্ত অভিজিৎ সিনহাই সংবাদ মাধ্যমৰ আগত প্ৰকাশ কৰে যে শান্তিপূৰ্ণ আৰু সংঘাতমুক্ত নিৰ্বাচন নিশ্চিত কৰিবলৈ আন্ত:ৰাজ্যিক আৰু আন্ত:জিলা সীমান্তত সুৰক্ষা ব্যৱস্থা কটকটীয়া কৰি তোলা হ’ব।
ম্যানমাৰৰ সৈতে নাগালেণ্ডৰ ২১৫ কিলোমিটাৰ জোৰা সীমান্ত অঞ্চল আছে যাৰ সিপাৰে এনএছচিএন (কে) আৰু আলফা (স্বা:) কে ধৰি কেইবাটাও বিদ্ৰোহী সংগঠনে শিৱিৰ স্থাপন কৰি আছে।
কোহিমাত সংবাদ মাধ্যমেৰে সৈতে হোৱা বাৰ্তালাপত মুখ্য নিৰ্বাচনী আয়ুক্তগৰাকীয়ে কয় যে নিৰ্বাচন আয়োগৰ নিৰ্দেশ অনুসৰি ভাৰত-ম্যানমাৰ সীমান্তত পহৰাৰ দায়িত্বত থকা আছাম ৰাইফলছকে আন্ত:ৰাষ্ট্ৰীয় সীমান্তটোত শক্তি বৃদ্ধি কৰিবলৈ কোৱা হৈছে।
সিনহাই লগতে জনায় যে নিৰ্বাচনৰ বাবে ৰাজ্যখনৰ আইন শৃংখলা পৰিস্থিতি স্বাভাৱিক যদিও আয়োগে কোনো সুৰুঙা এৰিব খোজা নাই।
মুখ্য নিৰ্বাচনী বিষয়াগৰাকীয়ে কয় যে বিধানসভাৰ নিৰ্বাচনৰ প্ৰাক্ মুহূৰ্তত আন্তঃৰাষ্ট্ৰীয় সীমান্তৰ লগতে আন্তঃৰাজ্যিক তথা আন্তঃজিলা সীমান্তত যিকোনো সন্দেহজনক গতিবিধি সুক্ষ্মভাৱে নিৰীক্ষণ কৰিবলৈ গুৰুত্বপূৰ্ণ আৰু কৌশলগত স্থানসমূহত চিচিটিভি স্থাপন কৰা হ’ব।
সিনহাই লগতে কয় যে কেন্দ্ৰীয় চৰকাৰে নিৰ্বাচনৰ সময়ত আইন শৃংখলা পৰিস্থিতি বজাই ৰাখিবলৈ ২৭৬ টা অতিৰিক্ত কেন্দ্ৰীয় অৰ্দ্ধ সামৰিক বাহিনীৰ কোম্পানী প্ৰেৰণ কৰিব।
