উত্তৰ কাছাৰ পাৰ্বত্য জিলা স্বায়ত্তশাসিত পৰিষদৰ কাৰ্যনিৰ্বাহক সমিতিৰ কাৰ্যকাল ছমাহ বৃদ্ধি কৰা সন্দৰ্ভত গুৱাহাটী উচ্চ ন্যায়ালয়ে উত্তৰ বিচাৰিছে ৰাজ্য চৰকাৰৰ পৰা।
এই দাবী কৰিছে হাফলঙৰ প্ৰাক্তন বিধায়ক তথা পৰিষদৰ প্ৰাক্তন কাৰ্য্যবাহী সদস্য সমৰজিৎ হাফলংবাৰে। হাফলংবাৰে জনোৱামতে, তেওঁ গুৱাহাটী উচ্চ ন্যায়ালয়ত তৰা জনস্বাৰ্থ জড়িত এটা গোচৰত ন্যায়ালয়ৰ ডিভিজন বেন্সে ১৭ জুলাইত শুনানি লৈ চৰকাৰক বিষয়টোত উত্তৰ দিয়াৰ নিৰ্দেশ প্ৰদান কৰে। সেইমতে, অহা ২৫ জুলাইৰ ভিতৰত চৰকাৰী পক্ষৰ অধিবক্তাই আদালত উত্তৰ দাখিল কৰিব লাগিব।
উল্লেখনীয় যে একাদশ পাৰ্বত্য স্বায়ত্তশাসিত পৰিষদৰ কাৰ্যকাল অন্ত পৰিছিল যোৱা মাহৰ ৩ তাৰিখে। কিন্তু পৰিষদৰ নিৰ্বাচন অনুষ্ঠিত নকৰি ৰাজ্যপালে ৰাষ্ট্ৰীয় নাগৰিকপঞ্জী উন্নীতকৰণৰক কাৰণ হিচাপে দেখুৱাই পৰিষদৰ কাৰ্যকাল ছমাহৰ কাৰণে বৃদ্ধি কৰে।
ৰাজ্যপালৰ এই কাৰ্যকাল বৃদ্ধিৰ নিৰ্দেশক প্ৰত্যাহ্বান জনাই প্ৰাক্তন বিধায়ক সমৰজিত্ হাফলংবাৰ আদালতৰ দ্বাৰস্থ হৈছিল।
