ভাৰতৰ সৰ্বাধিক জনপ্ৰিয় খেল ক্ৰিকেটক উত্তৰ-পূবত আৰু অধিক জনপ্ৰিয় কৰাৰ উদ্দেশ্যে তথা উত্তৰ-পূবৰ ক্ৰিকেট উত্তৰণৰ দিশটোৰ প্ৰতি লক্ষ্য ৰাখি ভাৰতীয় ক্ৰিকেট নিয়ন্ত্ৰণ ব’ৰ্ড চমুকৈ বি চি চি আয়ে গঠন কৰিছে ‘টাস্ক ফ’ৰ্চ’।
আসন্ন ৰঞ্জী ট্ৰফী মেচৰ পূৰ্বে বিহাৰ আৰু উত্তৰ-পূবৰ বাবে বি চি চি আয়ে এই বিশেষ কাৰ্যবাহী দল গঠন কৰিছে।
এই বিশেষ দলটোত থাকিব টীম ইণ্ডিয়াৰ প্ৰাক্তন সদস্য তথা বৰ্তমান বি চি চি আইৰ বিষয়া ছাবা কৰিম, ৰত্নাকৰ শেট্টী, কে ভি পি ৰাও, আশীষ ভৌমিক আৰু ছাৰাদিন্দু মুখাৰ্জী।
বি চি চি আয়ে জনোৱা অনুসৰি এই বিশেষ দলটোৱে উত্তৰ-পূবৰ ক্ৰিকেটৰ উত্তৰণৰ বাবে খেলপথাৰৰ উন্নয়ন, আন্তঃগাঁথনিৰ উন্নয়ন, আধুনিকীকৰণ আদি সকলো দিশ পৰ্যবেক্ষণ কৰিব।
ইয়াৰ উপৰি এই বিশেষ দলটোৱে এই সকলোবোৰ পৰ্যবেক্ষণ কৰাৰ পাছত উত্তৰ-পূবৰ ক্ৰিকেট উত্তৰণৰ বাবে বি চি চি আয়ে কেনেধৰণৰ পদক্ষেপ গ্ৰহণ কৰে সেয়া সময়ত হে লক্ষ্যণীয় হ’ব বুলি আমাক জানিবলৈ দিয়ে অসম ক্ৰিকেট সন্থাৰ বিষয়ববীয়াই।
