শেহতীয়াকৈ ভাৰতীয় এথলেটিকছ জগতত চাঞ্চল্য সৃষ্টি কৰা অসম কন্যা হিমা দাসক ২০১৭ বৰ্ষৰ য়ুনাইটেড ব্ৰাডাৰ্ছ ক্লাব চমুকৈ য়ু বি চি অসম শ্ৰেষ্ঠ খেলুৱৈৰ বঁটাৰে সন্মানিত কৰা হ’ব। হিমাক সমাজসেৱী মহিলা হবিবন নেছা সোঁৱৰণী বঁটাৰ লগতে নগদ এক লাখ টকাৰ আৰ্থিক পুৰস্কাৰ প্ৰদান কৰা হ’ব।
আনহাতে, য়ু বি চি অসম শ্ৰেষ্ঠ উদীয়মান খেলুৱৈৰ বঁটাৰ বাবে নিৰ্বাচিত হৈছে ১৯ বছৰ অনুৰ্ধ্ব বিশ্বকাপ ক্ৰিকেটত ভাৰতীয় দলক প্ৰতিনিধিত্ব কৰা অন্যতম সদস্য তথা অসম সন্তান ৰিয়ান পৰাগ। ৰিয়ানে লাভ কৰিব পুতু শইকীয়া সোঁৱৰণী বঁটাৰ লগতে নগদ ৫০ হেজাৰ টকা।
উল্লেখ্য যে অহা ১ জুলাইত হোটেল নভ’টেলত এক আড়ম্বৰপূৰ্ণ অনুষ্ঠানৰ মাজেৰে মুখ্য মন্ত্ৰী সৰ্বানন্দ সোণোৱালৰ উপস্থিতিত খেলুৱৈ দুগৰাকীক উক্ত বঁটা প্ৰদান কৰা হ’ব।
য়ুনাইটেড ব্ৰাডাৰ্ছ ক্লাব চমুকৈ য়ু বি চিয়ে সোমবাৰে গুৱাহাটী প্ৰেছ ক্লাবত আয়োজন কৰা এক সংবাদমেলত এই বিষয়ে সদৰী কৰে ক্লাবৰ সভাপতি প্ৰণয় বৰদলৈয়ে। আনহাতে ৰাজ্যৰ অতিৰিক্ত আৰক্ষী সঞ্চালকপ্ৰধান পল্লৱ ভট্টাচাৰ্যই এই বছৰ য়ু বি চি অসম ক্ৰীড়া বঁটা লাভ কৰা আন খেলুৱৈ আৰু সংগঠকৰ নামো ঘোষণা কৰে।
ক্লাবটোৱে সেই মতে অসম ৰাইফলছ শ্বুটিং সন্থাৰ সম্পাদক ভৱ কলিতাক শ্ৰেষ্ঠ ক্ৰীড়া সংগঠক আৰু কমলাকান্ত সিঙক শ্ৰেষ্ঠ ফুটবল প্ৰশিক্ষকৰ বঁটা প্ৰদানৰ সিদ্ধান্ত গ্ৰহণ কৰিছে।
আনহাতে, ২০১৭ চনৰ ৰাষ্ট্ৰীয় তথা আন্তঃৰাষ্ট্ৰীয় ক্ৰীড়াক্ষেত্ৰত উজলি উঠা ১২ গৰাকী খেলুৱৈ-সংগঠকক সম্বৰ্ধনা দিবলৈ থিৰাং কৰা হৈছে। এইসকলৰ ভিতৰত আছে কৃষ্টি বড়ো, প্ৰাঞ্জল ভূমিজ, অস্মিতা চলিহা, লাভলিনা বৰগোহাঁই, হৃদয় হাজৰিকা, অংকুশিতা বড়ো, তৃষা গগৈ, অনু চেতিয়া, বিশ্বজিৎ ৰায়, অন্যতম ৰাজকোঁৱৰ, ৰ’দালি বৰুৱা আৰু সুকুমাৰ মেধি।
