মিজোৰামৰ প্ৰতিভাসম্পন্ন উদীয়মান মহিলা হকী খেলুৱৈ লালৰেমছিয়ামী কমনৱেল্থ গেমছৰ বাবে ঘোষণা কৰা ১৮জনীয়া ভাৰতীয় হকী দলত স্থান লাভ কৰি দেশক প্ৰতিনিধিত্ব কৰাৰ সুযোগ লাভ কৰিছে।
মিজোৰামৰ উদীয়মান ষ্ট্ৰাইকাৰগৰাকীয়ে ইয়াৰ পূৰ্বে দক্ষিণ কোৰিয়ালৈ যোৱা ভাৰতীয় হকী দলৰো সদস্য আছিল। দক্ষিণ কোৰিয়া ভ্ৰমণত লালৰেমছিয়ামীয়ে আটাইকেইখন মেচতে দুৰ্দান্ত প্ৰদৰ্শন কৰি দেশৰ হৈ তিনিটা গ’ল কৰিবলৈ সক্ষম হৈছিল।
উল্লেখ্য যে অষ্ট্ৰেলিয়াৰ গ’ল্ড কোষ্ট চহৰত অনুষ্ঠিত হ’বলগীয়া বহু প্ৰত্যাশিত কমনৱেল্থ গেমছত ভাৰতৰ মহিলা হকী দলটোৱে পুল এত মালেছিয়া, ইংলেণ্ড, দক্ষিণ আফ্ৰিকা আৰু ৱেলছৰ বিপক্ষে প্ৰতিদ্বণ্ডিতা আগবঢ়াব।
মিজোৰামৰ কলাছিবত জন্মগ্ৰহণ কৰি ডাঙৰ দীঘল হোৱা লালৰেমছিয়ামীয়ে ৰাজ্যখনৰ পৰা সৰ্বশ্ৰেষ্ঠ ঠেনজল ওমেনছ হকী ট্ৰেইনিং চেণ্টাৰৰ পৰা স্নাতক গ্ৰহণ কৰে।
যোৱা বছৰ অনুষ্ঠিত হোৱা এছিয়া কাপ প্ৰতিযোগিতাত মিজোৰামৰ এইগৰাকী প্ৰতিভাসম্পন্ন খেলুৱৈয়ে ভাৰতক প্ৰতিনিধিত্ব কৰি জাপান আৰু ছিংগাপুৰৰ বিৰুদ্ধে গ’ল কৰিবলৈ সক্ষম হৈছিল।
ছিনিয়ৰ ভাৰতীয় মহিলা হকী দলত স্থান পোৱাৰ পূৰ্বে লালৰেমছিয়ামীয়ে ২০১৬ চনত অনুষ্ঠিত হোৱা চতুৰ্থ সংখ্যক ১৮ বছৰ অনুৰ্ধ মহিলা ভাৰতীয় হকী দলত খেলি ৰাষ্ট্ৰীয় তথা আন্তঃৰাষ্ট্ৰীয় পৰ্যায়ত নিজৰ প্ৰতিভাৰ উমান দিছে। উক্ত প্ৰতিযোগিতাখনত তেওঁ তিনিটা গ’ল কৰিছিল।
১৮ বছৰ অনুৰ্ধ প্ৰতিযোগিতাখনত দেখুওৱা পাৰদৰ্শিতাৰ বাবেই মহিলা হকী দলৰ বিচাৰকে ছিনিয়ৰ পৰ্যায়ত ভাৰতক প্ৰতিনিধিত্ব কৰাৰ সুযোগ দিছিল এইগৰাকী মিজো প্ৰতিভাধৰ হকী খেলুৱৈক।
‘কোৰিয়া ভ্ৰমণসূচীৰ পাছতে মই বেংগালুৰুত হোৱা ভাৰতীয় প্ৰশিক্ষণ শিবিৰত অংশ লৈছিলো। আৰু সৌভাগ্য ক্ৰমে আগন্তুক কমনৱেল্থ গেমছৰ বাবে মই ভাৰতীয় হকী দলত স্থান লাভ কৰিবলৈ সক্ষম হ’লো’, এইদৰে নৰ্থ-ইষ্ট নাওৰ আগত মনৰ আনন্দ ব্যক্ত কৰে ষ্ট্ৰাইকাৰ লালৰেমছিয়ামীয়ে।
