কাজিৰঙাৰ হাতীখুলি চাহ বাগিচা অঞ্চলৰ ৩৭ নং ৰাষ্ট্ৰীয়পথত আজি পুৱাতেই সংঘৰ্টিত হৈছে নৈশবাছ আৰু ট্ৰাকৰ মুখামুখি সংঘৰ্ষৰ পথ দুৰ্ঘটনা ৷ এই পথ দুৰ্ঘটনাটোৰ ফলত প্ৰায় ২০জন লোক আহত হৈছে। ইয়াৰে ৭জন যাত্ৰী গুৰুতৰভাৱে আহত হৈছে৷
পুৱা প্ৰায় ৫-৩০ বজাতে সংঘটিত দুৰ্ঘটনাটোত মুঠ তিনিখনকৈ বাহন সংঘৰ্ষত পতিত হয় বুলি জানিব পৰা গৈছে৷
স্থানীয় লোকে জনোৱা মতে, হাতীখুলি চাহ বাগিচাৰ চিকিৎসালয়ৰ সমীপতে ৩৭ নং ৰাষ্ট্ৰীয় পথত থকা পকী দলঙৰ ওপৰতে গুৱাহাটীৰ পৰা যোৰহাটলৈ গৈ থকা AS 01 FC 9088 নম্বৰৰ যাত্ৰীবাহী নৈশবাছখনে বিপৰীত দিশৰ পৰা আহি থকা RJ 02 GB 8183 নম্বৰৰ ট্ৰাকখনৰ সৈতে মুখামুখিকৈ খুন্দা মাৰে৷ একে সময়তে নৈশবাছখনৰ পাছফালে আহি AS 05 C 4334 নম্বৰৰ ট্ৰেভেলাৰখনেও সাজোৰে খুন্দা মাৰে বাছখনত৷
দুৰ্ঘটনাটোত গুৰুতৰভাৱে আহত হোৱা ট্ৰাকৰ হেণ্ডিমেনজনৰ অৱস্থা সংকটজনক বুলি জানিব পৰা গৈছে৷ স্থানীয় লোক আৰু আৰক্ষীৰ সহযোগত আহত সকলক চিকিৎসালয়লৈ প্ৰেৰণ কৰা হৈছে৷ দুৰ্ঘটনাৰ পাছত প্ৰায় এঘন্টা সময়ৰ বাবে ৩৭ নং ৰাষ্ট্ৰীয় পথৰ যাতায়ত ব্যাহত হৈ পৰিছিল৷
