সদৌ অসম ছাত্ৰ সন্থা ( AASU ) আৰু ২৮ টা জনগোষ্ঠীয় সংগঠনে গুৱাহাটীত আয়োজন কৰা ‘গণ অনশন’ত আজি ২৯ মে’ত দেখা গ’ল এক অনন্য পৰিৱেশ। ‘জাতিধ্বংসী’ বিধেয়কখন বাতিলৰ দাবীত শিল্পী-সাহিত্যিককে ধৰি সমাজৰ সৰ্বস্তৰৰ লোকৰ লগতে আজি চানমাৰিৰ প্ৰতিবাদ থলীত সমবেত হ’ল বেলেগ বেলেগ ৰাজনৈতিক শিবিৰৰ কেইবাজনো নেতা।
অনশনত উপস্থিত থাকিল অসমৰ দুটাকৈ প্ৰধান ৰাজনৈতিক দল কংগ্ৰেছ আৰু অগপ।
মঙলবাৰৰ এই কাৰ্যসূচীত দীৰ্ঘদিনৰ মূৰত একেখন মঞ্চতে দেখা গ’ল আছু আৰু অগপৰ নেতৃত্বক। বহু বছৰৰ মূৰত আছুৰ মজিয়াত দেখা গ’ল অসম আন্দোলনৰ অন্যতম কাণ্ডাৰী, আছুৰ একালৰ সভাপতি প্ৰফুল্ল কুমাৰ মহন্তক।
উপস্থিত থাকিল অসম গণ পৰিষদৰ সভাপতি তথা মন্ত্ৰী অতুল বৰা, কাৰ্যকৰী সভাপতি মন্ত্ৰী কেশৱ মহন্ত, বিধায়ক উৎপল দত্তকে ধৰি ভালেসংখ্যক অগপৰ নেতা-কৰ্মী।
উল্লেখযোগ্য যে অসম গণ পৰিষদৰ শাসনৰ সময়ৰ পৰাই অগপ নেতৃত্ব বিশেষকৈ প্ৰফুল্ল কুমাৰ মহন্তক লৈ অসন্তুষ্ট আছিল সদৌ অসম ছাত্ৰ সন্থা। কিন্তু মঙলবাৰৰ চানমাৰিৰ খেলপথাৰৰ দৃশ্য সুকীয়া। জাতিৰ স্বাৰ্থত যেন নাই এতিয়া কোনো বিদ্বেষ।
কেৱল অগপই নহয়, বিধেয়কখনৰ বিৰোধিতাৰে ‘গণ অনশন কাৰ্যসূচী’লৈ আহিল কংগ্ৰেছৰো কে’বাগৰাকীও নেতা-কৰ্মী। উপস্থিত থাকিল কংগ্ৰেছ নেতা তথা এসময়ৰ অসম জাতীয়তাবাদী যুৱ ছাত্ৰ পৰিষদৰ সভাপতি অপূৰ্ব ভট্টাচাৰ্যৰ উপৰি কিশোৰ ভট্টাচাৰ্যকে ধৰি কে’বাগৰাকীও কংগ্ৰেছ প্ৰতিনিধি।
জাতিৰ অস্তিত্বৰ প্ৰতি ভাবুকিক লৈ আজি যেন একে ঘাটত নাও চপালেহি সকলো ৰাজনৈতিক শিবিৰৰ নেতাই।
