কালি নিশা চাবুৱাৰ নিজা বাসগৃহৰ পৰা সেনাই ‘ডি ওৱাই ৩৬৫’ নিউজ চেনেলৰ সাংবাদিক স্বৰূপজ্যোতি চেতিয়াক আটক কৰি লৈ যায়।
নিশা শোৱা পাটিৰ পৰাই উঠাই নিয়া স্বৰূপজ্যোতি চেতিয়াক বৰ্তমান নৱম ৰাজপুত ৰেজিমেন্টৰ ডিব্ৰুগড়ৰ সেনা ছাউনীত ৰখা বুলি জানিব পৰা গৈছে।
চাবুৱা প্ৰেছ ক্লাৱৰ সভাপতি তথা চেনেলৰ সাংবাদিক স্বৰূপজ্যোতি চেতিয়াক কি কাৰণে আটক কৰা হৈছে আৰু তেওঁক এতিয়া ক’ত ৰখা হৈছে সেই বিষয়ে আৰক্ষীয়ে এতিয়ালৈকে মুখ খোলা নাই।
মুখ্যমন্ত্ৰীৰ গৃহ জিলাতেই সেনা আৰক্ষীৰ হাতত সাংবাদিক নিৰ্যাতনৰ ঘটনাই সকলোকে আচৰিত কৰি তুলিছে।
সাংবাদিক চেতিয়াক মুক্তিৰ দাবীত আজি চাবুৱাত পথ অৱৰোধ কৰা হৈছে। সাংবাদিক আৰু বিভিন্ন দল সংগঠনৰ সদস্যই ৰাতিপুৱাৰে পৰা পথ অৱৰোধ কাৰ্যসূচী পালন কৰিছে।
অসমত বিভিন্ন সময়ত সাংবাদিকক আৰক্ষী তথা সেনাই গ্ৰেপ্তাৰ কৰি নিৰ্যাতন চলোৱাৰ ঘটনা সংঘটিত হৈ আহিছে আৰু ইয়াৰ বিৰুদ্ধে প্ৰৱল জনমত গঠন হৈছে বিগত সময়ত। কিন্তু সাংবাদিক নিৰ্যাতনৰ এনে নতুন ঘটনাই পুনৰ সংবাদ মাধ্যমৰ প্ৰতি চৰকাৰৰ দায়িত্বহীনতাৰ কথাকে উদঙাই দিছে।
