অৰুণাচল প্ৰদেশৰ টাৱাঙত প্ৰৱল আৰু প্ৰচুৰ তুষাৰপাতৰ বাবে আৱদ্ধ হৈ পৰা শ শ যান-বাহনৰ লগতে সহস্ৰাধিক লোকক উদ্ধাৰ কৰিবলৈ সক্ষম হয় সেনা। মঙলবাৰে সন্ধিয়া ছেলাপাছৰ ওচৰত হোৱা প্ৰৱল তুষাৰপাতৰ বাবে আৱদ্ধ হৈ পৰা বাহনৰ লগতে যাত্ৰী সকলক উদ্ধাৰৰ বাবে সেনাই তাৎক্ষণিকভাৱে আৰম্ভ কৰে অভিযান।
সেনাৰ নিৰন্তৰ অভিযানৰ ফলত ছয় শতাধিকৰো অধিক লোকক উদ্ধাৰৰ লগতে ভালেকেইখন গাড়ীও উদ্ধাৰ কৰিবলৈ সক্ষম হয়।
যোৱা দুদিনমানৰ পৰা উক্ত অঞ্চলত প্ৰায় দুই ফুটমান বৰফ পৰে যাৰ ফলত অহিৰগড় আৰু ছেলাপাছৰ মাজৰ ঠাইখিনিত আৱদ্ধ হৈ পৰে ভালেসংখ্যক বাহন।
হাবিলদাৰ প্ৰজ্ঞন ৰয়ৰ নেতৃত্বত এটা দলে ছেলাপাছৰ উত্তৰে অভিযান চলাই ১৮৮খন বাহন আৰু ৪০০ নাগৰিকক উদ্ধাৰ কৰি যশৱন্তত অস্থায়ীভাৱে পতা আশ্ৰয় শিবিৰলৈ আনে।
আনহাতে কেপ্তেইন তৰুণ সিং গুলেৰিয়া আৰু কেপ্তেইন লাৱণ্য শৰ্মাৰ নেতৃত্বত গঠিত দুটি দলে ছেলাপাছৰ দক্ষিণে অভিযান চলাই ২৮০ নাগৰিক আৰু ১৩২ বাহন উদ্ধাৰ কৰে।
উল্লেখ্য যে ১৩,০০০ ফুট উচ্চতাত মাইনাছ ডিগ্ৰী উষ্ণতাত অভিযান চলোৱাটো সেনাবাহিনীৰ বাবে আছিল যথেষ্ট কষ্টকৰ। কিন্তু সকলো বাধা একাষৰীয়া কৰি সাত ঘণ্টা চলোৱা প্ৰচেষ্টাৰ অন্তত আৱদ্ধ লোকসকলক উদ্ধাৰ কৰিবলৈ সক্ষম হয়।
