আজি তিনিমাহ ধৰি ডিটেনশ্যন কেম্পত আবদ্ধ হৈ থকা ১০২ বছৰীয়া বৃদ্ধ চন্দ্ৰধৰ দাসক কাছাৰ জিলাৰ শিলচৰস্থিত বিদেশী ন্যায়াধীকৰণে বুধবাৰে জামিনত মুকলি কৰি দিয়ে।
উল্লেখযোগ্য যে বুধবাৰে বিদেশী ন্যায়াধীকৰণে পূৰ্বে চন্দ্ৰধৰ দাসক বিদেশী বুলি কৰা ঘোষণাক খাৰিজ কৰিছে।
আনহাতে চন্দ্ৰধৰ দাসৰ উকীল সুমন চৌধুৰীয়ে জানিবলৈ দিয়া অনুসৰি বিদেশী ন্যায়াধিকৰণে যদিও চন্দ্ৰধৰ দাসক জামিনত মুকিল কৰি দিয়ে কিন্তু ইয়াৰ পিছতো দাস ন্যায়াধীকৰণত উপস্থিত হৈ ভাৰতীয় নাগৰিকত্ব হোৱাৰ দাবী উত্থাপনৰ বাবে প্ৰয়োজনীয় নথি-পত্ৰ ৪ জুলাইত জমা কৰিব লাগিব।
কাছাৰ জিলাৰ বৰাক ভেলীৰ বৰাই বস্তিৰ নিৱাসী চন্দ্ৰধৰ দাসৰ হাতত ১৯৬৬ চনৰ ভোটাৰ কাৰ্ড থকাৰ পিছতো বিদেশী ন্যয়াধীকৰণে ২ জানুৱাৰীত বিদেশী বুলি ঘোষণা কৰে।
আনহাতে চন্দ্ৰধৰ দাসৰ জীয়ৰী মিনতি ৰয়ে কয়ে যে, ‘মোৰ পিতৃক বিদেশী ন্যায়াধিকৰণত ভাৰতীয় নাগৰিকত্বৰ প্ৰমাণ পত্ৰ দাখিল কৰিব নোৱাৰা আৰু ন্যায়াধিকৰণত উপস্থিত হ’ব নোৱাৰাৰ বাবে ডিটেইশ্যন কেম্পত ৰখা হৈছিল।’ লগতে মিনিতয়ে তেওঁৰ পিতৃয়ে ইতিমধ্যে বৃদ্ধ হোৱাৰ লগতে বিভিন্ন ৰোগত ভোগাৰ বাবে তেওঁৰ প্ৰয়োজনীয় নথি-পত্ৰ ক’ত ৰাখিছিল তাকো পহৰিলে বুলি উল্লেখ কৰি এজন ১০২ বছৰীয়া বৃদ্ধই এই কথা মনত ৰখাতো সম্ভৱ জানো বুলিও প্ৰশ্ন উত্থাপন কৰে?
প্ৰাপ্ত তথ্য মতে চন্দ্ৰধৰ দাসক চলিত বৰ্ষৰ মাৰ্চ মাহত ডিটেনশ্যন কেম্পলৈ প্ৰেৰণ কৰা হৈছিল।
