গুৱাহাটী মহানগৰীত পুনৰ নিৰ্মাণ হ’ব তিনিখন ফ্লাই অভাৰ। যানজঁট-প্ৰৱণ এলেকা হিচাপে চিহ্নিত গণেশগুৰি, দিচপুৰ, ছুপাৰ মাৰ্কেট আৰু চাৰাবভাতীত নিৰ্মাণ হ’ব এই তিনিখন ফ্লাই অ’ভাৰ। গড়কাপ্তানী বিভাগক এই ফ্লাই অ’ভাৰকেইখনৰ নিৰ্মাণৰ দায়িত্ব ইতিমধ্যেই দিয়া হৈছে।
২০০১-০২ চনত নিৰ্মিত গণেশগুৰিৰ ফ্লাই অ’ভাৰত যানজঁট বেছি নহয় যদিও ইয়াৰ তলেৰে যোৱা জি এছ ৰ’ডৰ দুয়ো দিশত আৰু নাৰ্ছাৰীৰ পৰা ফ্লাই অ’ভাৰৰ তলেৰে গণেশ মন্দিৰলৈ যোৱা পথটোত যানজঁটৰ সমস্যাই ক্ৰমে ভয়াৱহ ৰূপ ধাৰণ কৰিছে।
এই যানজঁটৰ সমস্যা লাঘৱ কৰাৰ বাবে গড়কাপ্তানী বিভাগে গণেশগুৰিত পুনৰ আন এখন উৰণীয়া সেতু (ফ্লাই অ’ভাৰ) নিৰ্মাণৰ পৰিকল্পনা কৰিছে। এই সেঁতুখন আৰ জি বৰুৱা পথৰ নাৰ্ছাৰীৰ পৰা গণেশগুৰিত থকা উৰণীয়া সেতুখনৰ ওপৰেৰে ৰাজেন্দ্ৰ প্ৰসাদ পথৰ গণেশ মন্দিৰলৈ নিৰ্মাণ কৰা হ’ব। সেঁতুখনৰ দৈৰ্ঘ্য প্ৰায় ১ কিলোমিটাৰ নিৰ্ধাৰণ কৰা হৈছে। এই সেঁতুখনেৰে যান-বাহন দুয়োদিশত অহা-যোৱা কৰিব পাৰিব।
ইপিনে, দিচপুৰ ছুপাৰ মাৰ্কেটৰ ওচৰত নিৰ্মাণ কৰিব লগীয়া উৰণীয়া সেঁতুখন ভঙাগড়ত থকা উৰণীয়া সেঁতুখনৰ নিচিনাকৈ নিৰ্মাণ কৰা হ’ব। এই সেঁতুখনেৰে গণেশগুৰিৰ দিশৰ পৰা অহা বাহনবোৰ পোনে পোনে খানাপাৰালৈ আৰু সোঁফালে ঘূৰি দিচপুৰ লাষ্ট গেইটৰ দিশলৈও যাব পাৰিব। অৰ্থাৎ গণেশগুৰিৰ দিশৰ পৰা অহা বাহনবোৰ খানাপাৰা আৰু দিচপুৰ লাষ্ট গেইটলৈ দুটা দিশত যাব পাৰিব। অৱশ্যে সেঁতুখনৰ ওপৰেৰে খানাপাৰা আৰু লাষ্ট গেইটৰ দিশৰ পৰা গণেশগুৰিলৈ অহাৰ ব্যৱস্থা নাথাকিব। খানাপাৰা আৰু লাষ্ট গেইটৰ দিশৰ পৰা অহা বাহনবোৰ সেঁতুখনৰ তলৰ পথৰে গণেশগুৰিৰ দিশলৈ যোৱাৰ ব্যৱস্থা থাকিব। টি আকৃতিৰ এই সেঁতুখনৰ দৈৰ্ঘ্য প্ৰায় ১ কিলোমিটাৰ হ’ব। আনহাতে, চাৰাবভাতী চাৰিআলিত নিৰ্মাণ হ’বলগীয়া উৰণীয়া সেঁতুখনৰ আকৃতি যোগ চিনৰ দৰে হ’ব। অৰ্থাৎ তাত দুখন সেঁতু একেলগে নিৰ্মাণ হ’ব। এই সেঁতু বি কে কাকতী পথৰ দিশৰ পৰা চাৰাবভাতী চাৰিআলিৰ ওপৰেৰে চাবিপুলৰ সতী জয়মতী পথলৈ নিৰ্মাণ কৰা হ’ব। আনখন গুৱাহাটী গড়ভাংগা পথৰ ওপৰেৰে অৰ্থাৎ ৰিহাবাৰীৰ দিশৰ পৰা চাৰিআলি হৈ ডাঃ বি বৰুৱা কৰ্কট ৰোগ প্ৰতিষ্ঠানৰ দিশলৈ নিৰ্মাণ কৰা হ’ব। দুয়োখন সেঁতুৰে দুয়োদিশত অহা-যোৱা কৰিব পাৰিব।
গড়কাপ্তানী বিভাগে জনায় যে সেঁতুকেইখনৰ নিৰ্মাণৰ বাবে ‘ফিজিবিলিটী ষ্টাডি’ আৰু ‘ছইল টেষ্টিং’ ইতিমধ্যে সম্পূৰ্ণ কৰা হৈছে। বৰ্তমান তিনিওখন সেঁতুৰ বিস্তৃত প্ৰকল্প প্ৰতিবেদন (ডি পি আৰ) প্ৰস্তুত কৰাৰ কাম আৰম্ভ কৰা হৈছে। গণেশগুৰিত নিৰ্মাণ কৰিব লগীয়া সেঁতুখনৰ ডি পি আৰ বেংগালুৰুৰ আৰ্কিটেক্ট কনছালটেণ্ট প্ৰাইভেট লিমিটেডে (এ চি পি এলে) প্ৰস্তুত কৰি আছে।
আনপিনে ছুপাৰ মাৰ্কেট আৰু চাৰাবভাতীত নিৰ্মাণ কৰিব লগীয়া সেঁতু দুখনৰ ডি পি আৰ দিল্লীৰ ৰাইটছে প্ৰস্তুত কৰি আছে। তিনিওখন সেঁতুৰ ডি পি আৰ প্ৰস্তুত কৰাৰ বাবে ডেৰ কোটি টকা নিৰ্ধাৰণ কৰা হৈছে। গড়কাপ্তানী বিভাগৰ সূত্ৰটোৱে জনোৱা মতে অহা দুমাহৰ ভিতৰত ডি পি আৰ প্ৰস্তুত সম্পূৰ্ণ কৰাৰ সময় নিৰ্ধাৰণ কৰা হৈছে। ডি পি আৰ প্ৰস্তুত কৰাৰ পিছতহে সেঁতুকেইখনৰ নিৰ্মাণৰ কাম আনুষ্ঠানিকভাৱে আৰম্ভ হ’ব। সূত্ৰটোৱে জনায় যে ডি পি আৰ সময়ত হ’লে অহা বছৰৰ পৰা সেঁতুকেইখনৰ নিৰ্মাণৰ কাম আৰম্ভ কৰিব পৰা যাব। উৰণীয়া সেঁতুকেইখন নিৰ্মাণত কিছু ভূমি অধিগ্ৰহণৰ প্ৰয়োজন হ’ব। ছুপাৰ মাৰ্কেটৰ সেঁতুখন নিৰ্মাণৰ চৰকাৰী ভূমি কিছু অধিগ্ৰহণৰ প্ৰয়োজন হ’ব। আকৌ গণেশগুৰি আৰু চাৰাবভাতীত সেঁতু দুখনৰ নিৰ্মাণৰ বাবে কিছু ব্যক্তিগত ভূমি অধিগ্ৰহণৰ প্ৰয়োজন হ’ব।
