জেট এয়াৰৱেজৰ পাছত মিতব্যয়ী বিমান পৰিবহণ কোম্পানী স্পাইচজেটে ত্ৰিপুৰাৰ ৰাজধানী আগৰতলালৈ বিমান পৰিবহণ সেৱা স্থগিত কৰাৰ সিদ্ধান্ত গ্ৰহণ কৰিছে। আজি এগৰাকী বিষয়াই জনোৱা মতে বিমান কোম্পানীটোৰ এনে হঠকাৰী সিদ্ধান্তৰ বিৰুদ্ধে ত্ৰিপুৰাৰ মুখ্য মন্ত্ৰীগৰাকীয়ে কেন্দ্ৰীয় অসামৰিক বিমান পৰিবহণ মন্ত্ৰীৰ হস্তক্ষেপ বিচাৰিব বুলি জানিব পৰা গৈছে।
ত্ৰিপুৰাৰ মুখ্য মন্ত্ৰী বিপ্লব কুমাৰ দেবে শুকুৰবাৰে বিমান কোম্পানীটোৰ দ্বাৰা ৰাজ্যখনত বিমান সেৱা স্থগিতকৰণৰ সিদ্ধান্তত হস্তক্ষেপ কৰাৰ বাবে কেন্দ্ৰীয় অসামৰিক বিমান পৰিবহণ মন্ত্ৰী সুৰেশ প্ৰভুক অনুৰোধ জনাইছে বুলি মুখ্য মন্ত্ৰীৰ সচিবালয়ৰ এগৰাকী বিষয়াই কৈছে।
উল্লেখ্য যে ইয়াৰ পূৰ্বে ৰাজহ ঘাটিৰ দোহাই দি জেট এয়াৰৱেজে ত্ৰিপুৰাত ইয়াৰ বিমান সেৱা বন্ধ কৰিছে।
বৰ্তমানে ইণ্ডিগ’ আৰু এয়াৰ ইণ্ডিয়াই আগৰতলালৈকে বিমান সেৱা আগবঢ়াই আছে। এই বিমান পৰিচালনা কোম্পানী দুটাই আগৰতলাৰ পৰা দিল্লী, কলকাতা, গুৱাহাটী, ইম্ফল আৰু শিলচৰৰ মাজত পোনপটীয়া বিমান সেৱা আগবঢ়ায়।
উল্লেখ্য যে বিগত সপ্তাহত ত্ৰিপুৰাৰ অন্তিম ৰজা মহাৰাজ বীৰ বিক্ৰম কিশোৰ মাণিক্য বাহাদুৰৰ নামেৰে নতুনকৈ নামকৰণ কৰা আগৰতলা বিমানঘাটীটো গুৱাহাটীৰ পিছতেই ব্যস্ততম বিমানঘাটী।
ভাৰতীয় বিমানঘাটী প্ৰাধিকৰণৰ এগৰাকী বিষয়াই জনাইছে যে আগৰতলা বিমানঘাটীটোত বিশ্বমানৰ সা-সুবিধা প্ৰদান কৰি ইয়াক উন্নত কৰাৰ বাবে ভাৰতীয় বিমানঘাটী প্ৰাধিকৰণে এটা ৪৩৮ কোটি টকা ব্যয়সাপেক্ষ এটা প্ৰকল্প আৰম্ভ কৰিছে।
নতুন টাৰ্মিনেল বিল্ডিং, ৰানৱে আৰু অন্যন্য আন্তঃগাঁথনি নিৰ্মাণ কৰাৰ বাবে ৰাজ্য চৰকাৰে ভাৰতীয় বিমানঘাটী প্ৰাধিকৰণৰ হাতত ৭২ একৰ ভুমি অৰ্পণ কৰিছে।
