৯ মাৰ্চত নতুন চৰকাৰৰ মুখ্য মন্ত্ৰীৰূপে শপত গ্ৰহণ কৰিবলগীয়া তথা ত্ৰিপুৰা ভাৰতীয় জনতা পাৰ্টীৰ (বিজেপি) অধ্যক্ষ বিপ্লব কুমাৰ দেবে নতুন কৰ্মজীৱনৰ দায়িত্ব গ্ৰহণ কৰাৰ পূৰ্বে ৰাজ্যখনৰ বিভিন্ন মন্দিৰ দৰ্শন কৰি ভগৱানৰ আশিস লোৱা দেখা গ’ল। মন্দিৰ দৰ্শনৰ সময়ত বিপ্লব কুমাৰ দেবৰ লগত আছিল তেওঁৰ পত্নী আৰু সন্তান।
মুখ্য মন্ত্ৰী ৰূপে শপত লোৱাৰ পূৰ্বেই ত্ৰিপুৰাৰ বিজেপি অধ্যক্ষ বিপ্লব দেবে উদয়পুৰস্থিত চাটুদাস দেৱতা আৰু মাতা ট্ৰিপুশ্বৰী মন্দিৰ দৰ্শন কৰি আশীৰ্বাদ লোৱা দেখা গ’ল।
উল্লেখ্য যে আছাম ৰাইফলছ পেৰেড গ্ৰাউণ্ডত হ’বলগীয়া শপত গ্ৰহণ সমাৰোহ অনুষ্ঠানত দেশৰ প্ৰধান মন্ত্ৰী নৰেন্দ্ৰ মোদীৰ লগতে বিজেপি শাসিত ৰাজ্যকেইখনৰ মুখ্য মন্ত্ৰীসকলৰ লগতে দেশৰ আগশাৰীৰ নেতা-কৰ্মীসকল উপস্থিত থকাৰ পূৰ্ণ সম্ভাৱণা আছে বুলি এক শুত্ৰৰ পৰা জানিব পৰা গৈছে।
শপত গ্ৰহণ সমাৰোহত অংশ লোৱাৰ উদ্দেশ্যে ৰাজ্যখনলৈ আহিবলগীয়া ভিভিআইপি ব্যক্তিসকলক সুৰক্ষা দিয়াৰ বাবে ইতিমধ্যে ৰাজ্যৰ প্ৰশাসন আৰু আৰক্ষীয়ে সকলো ধৰণৰ যাৱতীয় ব্যৱস্থা গ্ৰহণ কৰা পৰিলক্ষিত হৈছে।
মনকৰিবলগীয়া যে নতুন চৰকাৰৰ শপত গ্ৰহণ সমাৰোহৰ বাবে ৰাজ্যখনৰ মাধ্যমিক পৰিষদৰ পৰীক্ষা ৯ মাৰ্চৰ বিপৰীতে অন্য দিনলৈ পিছুৱাই দিয়া বুলিও চৰকাৰী শুত্ৰই জানিবলৈ দিয়ে।
ইফালে নিৰ্বাচনৰ ফলাফল ঘোষণা কৰাৰ পিছৰে পৰা ৰাজ্যখনত বিজেপিৰ সমৰ্থকসকলে বাওঁ পন্থী নেতা-কৰ্মীসকলৰ ওপৰত চলোৱা আক্ৰমণ বিজেপি দলৰ সংস্কৃতি নহয় বুলি বিপ্লব কুমাৰ দেৱে সংবাদ মাধ্যমৰ আগত প্ৰকাশ কৰে।
