নৰ্থ-ইষ্ট ইনিচিয়েটিভ ডেভেলপমেণ্ট এজেন্সি(NEIDA) আৰু লক্ষীমপুৰ পশু চিকিৎসা বিজ্ঞান মহাবিদ্যালয়ে জানুৱাৰি ১৭ আৰু ১৮ তাৰিখে আয়োজন কৰা গাহৰি পালন কৰ্মশালাৰ বুধবাৰে সমাপ্তি ঘটে। দুদিনীয়াকৈ আয়োজন কৰা কৰ্মশালাখন উত্তৰ লক্ষীমপুৰৰ জয়হিঙস্থিত অসম কৃষি বিশ্ববিদ্যালয়ৰ অধিনিষ্ঠ লক্ষীমপুৰ পশু চিকিৎসা বিজ্ঞান মহাবিদ্যালয়ত অনুষ্ঠিত হয়।
অৰুণাচল প্ৰদেশৰ য়াজিল, দৈমুখ আৰু কিমিমৰ মুঠ ৩৫ গৰাকী কৃষকে উক্ত কৰ্মশালাখনত অংশগ্ৰহণ কৰা বুলি উদযাপন সমিতিয়ে জানিবলৈ দিছে। লক্ষীমপুৰ পশু চিকিৎসা বিজ্ঞান মহাবিদ্যালয়ৰ সহযোগী ডিন ড০ ইউ আৰ তামুলীয়ে প্ৰশিক্ষণ শিবিৰৰ শুভাৰম্ভণি কৰিছিল।
উদ্বোধনী অনুষ্ঠানত ড০ তামুলীয়ে প্ৰশিক্ষণাৰ্থী সকলক উদ্দেশ্যি কয় যে গাহৰি পালনৰ লগতে নিজকে স্বাবলম্বী কৰি তুলিবলৈ অন্য পশুও উন্নত মানৰ বৈজ্ঞানিক পদ্ধতিৰে পালন কৰিবলৈ আহ্বান জনায়। তদুপৰি গাঁৱৰ লোকসকলক অৰ্থনৈতিকভাবে আত্মনিৰ্ভৰশীল কৰাৰ উদ্দেশ্যেৰে NEIDA ই গ্ৰহণ কৰা বিভিন্ন পদক্ষেপকো ভূয়সী প্ৰশংসা কৰে ড০ তামুলীয়ে।
অৰুণাচল প্ৰদেশৰ কৃষক সকলৰ বাবে আয়োজন কৰা প্ৰশিক্ষণ শিবিৰৰ বাবে উদযাপন সমিতিৰ সম্পাদক ড০ সঞ্জীৱ খাৰঘৰীয়াই অনুষ্ঠানৰ স্বাগতম ভাষণত NEIDA ক ধন্যবাদ জনায়।
আনহাতে NEIDAৰ বিষয়ববীয়া ড০ প্ৰভাত বৰুৱাই বৈজ্ঞানিক পদ্ধতিৰে কিদৰে গাহৰিৰ প্ৰজনন বৃদ্ধি কৰিব পাৰি সেই সম্পৰ্কে কৃষক সকলৰ বাবে প্ৰশিক্ষণ শিবিৰ তথা কৰ্মশালাখনৰ ব্যৱস্থা কৰা হোৱা বুলি জনায়।
ইয়াৰ উপৰি কৰ্মশালাখনত লক্ষীমপুৰ পশু চিকিৎসা বিজ্ঞান মহাবিদ্যালয়ৰ বিভিন্ন প্ৰশিক্ষণ প্ৰাপ্ত লোকে গাহৰি উৎপাদন, পশুৰ স্বাস্থ্য সম্বন্ধীয় তথা অন্যান্য বিষয়ত কৃষক সকলৰ লগত মত বিনিময় কৰে।
সফল পৰিসমাপ্তি ঘটা প্ৰশিক্ষণ শিবিৰৰ অন্তিম দিনা তিনিজন কৃষকক নিজৰ নিজৰ দক্ষতাৰ পৰিচয় দিয়াৰ বাবে আয়োজক সমিতিয়ে পুৰস্কৃত কৰে।
